Almaty oblysy Jolaýshylar kóligi basqarmasy basshysynyń eks-orynbasary ustaldy

ASTANA. QazAqparat –Almaty oblysynyń Jolaýshylar kóligi jáne avtomobıl joldary basqarmasy basshysynyń burynǵy orynbasary qamaýǵa alyndy. Ol aýylǵa kireberis joldy jóndeý kezinde qyzmettik jaǵdaıyn asyra paıdalanyp, memleketke 37 mln teńgeden astam somaǵa zalal keltirdi dep kúdiktelýde. QazAqparat bul týraly Bas prokýratýraǵa silteme jasap habarlaıdy.

«Jetisý oblysy prokýratýrasynyń arnaıy prokýrorlary laýazymdyq ókilettikterin asyra paıdalandy degen kúdikpen»Almaty oblysynyń jolaýshylar kóligi jáne avtomobıl joldary basqarmasy«MM basshysynyń burynǵy orynbasaryn ustap, ýaqytsha ustaý ızolıatoryna qamaýǵa aldy.

Ol Kerbulaq aýdany Malaısary aýylyna kireberis jolǵa jóndeý jumystaryn júrgizý kezinde óziniń qyzmettik jaǵdaıyn teris paıdalandy dep kúdiktelýde.

Memleketke 37 mln teńgeden astam somaǵa eleýli materıaldyq zalal keltirildi.

Osy fakti boıynsha QR Qylmystyq kodeksiniń 361-baby 4-bóligi 3-tarmaǵymen (laýazymdyq ókilettikterdi teris paıdalaný) sotqa deıingi tergeý júrgizilip jatyr», - delingen habarlamada.

Bas prokýratýra QR Qylmystyq-protsessýaldyq kodeksiniń 201-babyna súıenip, sotqa deıingi tergep-tekserýdiń ózge derekteri jarııa etýge jatpaıtynyn málim etti.

Tergeý jalǵasyp jatyr.