Almaty oblysy: Joǵalǵan oqýshy qyz súıiktisiniń úıinen tabyldy
TALDYQORǴAN. QazAqparat - Almaty oblysynda joǵalǵan oqýshy qyz Jambyl oblysynan tabyldy. Jasóspirim Qordaı aýylyndaǵy súıiktisiniń úıinde bolǵan, dep habarlaıdy QazAqparat tilshisi.
Oblystyq ІІD qyzmetkerleri qyzdy 11 kún boıy izdegen. Іzdeý jumystaryna Jambyl aýdandyq ІІB polıtseıleri, Qastek aýylyndaǵy mektep muǵalimderi men týystary qatysqan.
Aldymen olar aýyl ishin súzip ótip, odan keıin eldi meken mańyndaǵy aýmaqta izdegen. Sondaı-aq oqýshynyń týystary jáne qurbylarynyń úılerin de qarap shyqqan. Jedel izdestirý barysynda tártip saqshylary oqýshynyń Jambyl oblysy Qordaı aýylyndaǵy jigitiniń úıinde jasyrynyp jatqanyn anyqtady.
Keshe qyz óz úıine jetkizilip, ata-anasyna tabystaldy. Oqýshyny ıývenaldy polıtsııa qyzmetkerleri tirkeýge alyp, onymen ata-anasynyń kózinshe túsindirý jumystaryn júrgizdi.
