Almaty oblysy týrısterdi sıyr saýyp, shóp shabýmen qyzyqtyryp kórmek
TALDYQORǴAN. QazAqparat - Almaty oblysynda aýylsharýashylyq týrızmin damytý boıynsha sheberlik sabaqtary ótýde, dep habarlaıdy QazAqparat tilshisi.
Óńir agrotýrızmdi damytýǵa óte qolaıly óńir. Sebebi halyqtyń 70 paıyzy aýyldy jerde turady. Jer jánnaty Jetisýda týrızmdi shuraıly tabıǵatymen ǵana emes, onda turatyn halqy jáne olardyń kúndelikti kásibimen de damytýǵa bolady. Osyǵan oraı, Taldyqorǵanda oblystyq týrızm basqarmasy, «Atameken» kásipkerler palatasy jáne Ortalyq Azııa ýnıversıtetiniń uıymdastyrýymen ekikúndik sheberlik saǵaty ótip jatyr. Semınar barysynda tyńdaýshylarǵa qonaqúı bıznesin júrgizý jáne agrotýrızmniń modelderi boıynsha dárister oqylyp, mysaldar keltirilýde.
Jalpy agrotýrızm Eýropa elderinde 1970 jyldary qolǵa alynǵan. Al TMD elderine 1990 jyldary kelgen. «Qazaqstannyń kez kelgen óńirinde agrotýrızmdi qolǵa alýǵa bolady. Sebebi ár oblystyń óz tabıǵı jáne aýylsharýashylyq erekshelikteri bar», - deıdi ál-Farabı atyndaǵy Qazaq ulttyq ýnıversıteti rekreatsııalyq geografııa kafedrasy dotsentiniń mindetin atqarýshy, geografııa ǵylymdarynyń kandıdaty Álııa Aqtymbekova.
Ǵalymnyń aıtýynsha týrıster sońǵy kezde sıyr saý, shóp shabý, kartop qazý syndy belsendi eńbek demalysyn tańdaı bastaǵan. Olarǵa aýylsharýashylyq ónimderin birge daıyndaý, óndirý protsesteri óte qyzyq. Al Almaty oblysynda mundaı múmkindik molynan. Kez kelgen aýylda mal da, jer de bar. Monıtorıng derekteri boıynsha, 2017 jyly týrısterdi ornalastyratyn 680 oryn tirkelgen. Ol jerde 1,5 mln adam tynyǵyp qaıtqan. Emdik-saýyqtyrý qyzmetteriniń kólemi 8 mlrd 310 mln teńgege jetti. Bul 2016 jylmen salystyrǵanda 50% artyq. Bıyl týrıster aǵymyn 1,6 mln adamǵa, emdik-saýyqtyrý qyzmeti kólemin 8,8 mlrd teńgege deıin jetkizý josparlanyp otyr.
