Almaty oblysy tolyqtaı tsıfrlyq teleradıohabar taratýǵa kóshti

TALDYQORǴAN. QazAqparat - Búgin Almaty oblysynyń Panfılov aýdany Jarkent qalasynda analogty teleradıo habarlaryn tolyqtaı óshirý rásimi ótti. Memlekettik jobany iske asyrý barysynda oblystaǵy 772 eldi mekendi tsıfrlyq efırlik teleradıohabar sıgnalymen qamtıtyn 90 radıotelevızııalyq stansy salynyp, jańartyldy. Bul týraly Panfılov aýdany ákiminiń baspasóz qyzmetinen málim etti, dep habarlaıdy QazAqparat tilshisi

Aımaqtaǵy eń iri Jarkent teleradıo stansysynda aýdan ákimi Temirlan Bektasov analogty habar taratý jelisin óshirip, barsha jýrnalısterdi kásibı merekemen quttyqtady.

Almaty oblystyq radıotelehabar taratý dırektsııasynyń dırektory Qaısar Razdyqovtyń aıtýynsha, qazirgi kezde tsıfrlyq efırlik teleradıohabar taratýǵa Almaty oblysynan basqa da eki óńir qosylǵan. «Kezeń-kezeńimen iske asatyn joba 2021 jyly elimiz boıynsha tolyqtaı tsıfrlyq efırlik formatqa kóshiriledi», - dedi ol.

Jarkent teleradıo stansysynyń jedel kezekshisi Ákimjan Qudaıberdıev buǵan deıin analogty telehabar taratýda mehanıkalyq jumystar kóp bolǵanyn aıtady. «Aýyl-aýyldardy aralap, jumys jasaıtynbyz. Qazir mine, barlyǵy tsıfrlyq júıege kóshti. Endi, barlyǵy avtomat. Kompıýtermen basqaramyz», - dedi.

Aıta ketý kerek, qazirdiń ózinde oblys ortalyǵynda tsıfrlyq sapada 30-ǵa jýyq telearna kórsetilse, aýyldyq eldi mekenderde 15-ke tarta telearna kórsetiledi.