Almaty oblysy: Taýda joǵalǵan balanyń ata-anasy shopannyń ústinen aryz jazdy
ALMATY. QazAqparat - Almaty oblysynda ata-ana balasynyń qolynan telefonyn tartyp almaq bolyp, qorqytqan qoıshyǵa qatysty aryz jazdy. Keıinnen álgi qoıshydan qoryqqan bala qashyp ketip, sodan tabylmaǵan edi, dep habarlaıdy QazAqparat tilshisi.
Qazir bul aryz Almaty oblysy Jambyl aýdany poltsııasynyń qaraýynda.
Budan buryn habarlaǵanymyzdaı, bul qoıshy balalardy telefonymdy qaıtaryńdar dep qorqytqan.
Balalarǵa ses kórsetken 45 jastaǵy qoıshy polıtsııaǵa bergen jaýabynda telefondy shynymen alyp qoımaq bolǵanyn moıyndaǵan.
Biraq, balalar qashyp ketken soń olardy esh jerden kórmegenin aıtqan.
«Balanyń ata-anasy qoıshyǵa qarsy aryz berdi. Tergeý oryndary shopannyń áreketine quqyqtyq baǵa beretin bolady. Ony ustaýǵa eshqandaı negiz joq. Bul shopannyń joǵalǵan balaǵa qatysy bar-joǵyn tap basyp aıta almaımyz», - dedi oblystyq ІІD baspasóz qyzmetiniń jetekshisi Sergeı Neznaev.
Polıtseıdiń aıtýynsha, qazir qoıshynyń ózi de balany izdestirý sharalaryna qatysyp jatyr.
Aıta ketý kerek, Almaty oblysynyń Jambyl aýdanynda joǵalyp ketken bala 14 shildeden beri izdestirýde. 2011 jyly týǵan Ernur Sádýaqas Yntymaq aýylynan ońtústik qaptaldaǵy «Kishi saz» jaıylymyna bara jatqan jolda taýly aýmaqta joǵalǵan. 7 jastaǵy Ernurmen birge úlkendi-kishili 5 bala jolǵa shyqqan. Qazir balalardyń barlyǵy aýylda. Tek Ernur ǵana oralmady.
6-kúnge jalǵasqan izdeý sharalary áli nátıje bergen joq.
Jalpy alǵanda balany tabý úshin 115 adam: qutqarýshylar, polıtsııa, áskerı qyzmetshiler, shekarashylar, jergilikti turǵyndar 22 shaqyrym radıýstaǵy jerdiń bárin tintip shyqty.
