Almaty oblysy Talǵar aýdanynyń eks-ákimine úkim shyqty

NUR-SULTAN. QazAqparat - Almaty oblysy Talǵar aýdanynyń burynǵy ákimi S. Erekeshev pen bólim basshysyna sot úkimi shyqty, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

«Aǵymdaǵy jyldyń 14 jeltoqsanynda Almaty oblysy Talǵar aýdandyq sotynyń úkimimen Talǵar aýdanynyń burynǵy ákimi Erekeshev sottalyp, oǵan 59,4 mln teńge aıyppul salyndy.

Osy úkimmen Talǵar aýdanynyń turǵyn úı-kommýnaldyq sharýashylyq jáne turǵyn úı ınspektsııasy bóliminiń basshysy Shamaev 29,7 mln teńge aıyppulǵa sottaldy», - delingen habarlamada.

Málim etilgendeı, atalǵan laýazymdy tulǵalar JShS dırektorynan sýmen jabdyqtaý júıesiniń qurylysy boıynsha oryndalǵan jumystardyń aktilerine qol qoıǵany jáne JShS-ny memlekettik qyzmetterdi josyqsyz jetkizýshi dep taný týraly sotqa talap-aryz jibermeý úshin 2 mln teńge somasynda para alǵan.

Úkim zańdy kúshine engen joq.