Almaty oblysy: ózderine zańsyz syıaqy taǵaıyndaǵan aýyl ákimderi jazalandy
QR Memlekettik qyzmet isteri agenttiginiń Almaty oblystyq departamenti baspasóz qyzmetiniń málimetine sáıkes Raıymbek aýdanyna qarasty úsh aýyl ákimi buryn alǵan sógisterine qaramastan ózderine syıaqy taǵaıyndaǵan. Alaıda kemshilik anyqtalǵannan keıin ákimder memleketke keltirgen shyǵyn ornyn toltyryp, alǵan syıaqylaryn tolyq qaıtarǵan. Qazaqstan Respýblıkasy memlekettik qyzmetshileriniń Ádep kodeksiniń 5-tarmaǵynyń 3-tarmaqshasyn buzyp, ıaǵnı ózderi qabyldaǵan sheshimderdiń zańdylyǵy men ádildigin qamtamasyz etpegenderi úshin olarǵa «qatań sógis» túrindegi tártiptik jaza qoldaný usynyldy.
Sondaı-aq, Kerbulaq aýdany boıynsha aýdan ákiminiń orynbasary qyzmet barasynda balaǵat sózder qoldanyp, dórekilik tanytqan. Qazaqstan Respýblıkasy memlekettik qyzmetshileriniń ádep kodeksiniń 5-tarmaǵynyń 2-tarmaqshasyn buzyp, ıaǵnı jalpy qabyldanǵan moraldyq-ádeptilik normalaryn saqtamaı, azamattarmen qarym-qatynasta sypaıylyq pen ádeptilik tanytpaǵany úshin Kerbulaq aýdany ákiminiń orynbasaryna «qatań sógis» túrindegi tártiptik jaza qoldaný usynysy jasaldy.
Ádep keńesinde Panfılov aýdany prokýratýrasynyń usynysy boıynsha Panfılov aýdany Qońyróleń aýyldyq okrýginiń ákimine qatysty tártiptik is qaraldy. Aýyl ákimi saıabaqtyń kúrdeli jóndeý jumystary aıaqtalmaı jatyp merdigerge qarjyny tolyq aýdaryp jibergen. Memlekettik qyzmetke kir keltiretin tártiptik teris qylyq jasaǵany úshin oǵan «qyzmetke tolyq sáıkes emestigi týraly eskertý» túrindegi tártiptik jaza qoldaný usynyldy.