Almaty oblysy Ózbekstanmen birqatar jobalardy júzege asyrýǵa nıetti
TALDYQORǴAN.QazAqparat - Almaty oblysynyń ákimi Amandyq Batalov bastaǵan bir top kásipkerler, ınvestıtsııalyq tartymdylyǵy zor aýdan basshylary men salalyq basqarma basshylary Ózbekstanǵa resmı saparmen bardy. Jetisýlyqtar aldymen Tóle bı babamyzǵa quran baǵyshtady, dep habarlaıdy QazAqparat tilshisi.
Birinshi kezekte «Ýzagrotehmash» kompanııasyna tıesili Tashkent traktor zaýytynyń jumysymen tanysqan Amandyq Batalov tehnıkany satyp alyp qana qoımaı, ony Jetisýda qurastyrý eki tarapqa tıimdi bolatyndyǵyn tilge tıek etti. Ol úshin Almaty oblysynyń múmkindigi zor ekendigin alǵa tartqan oblys ákimi "Taldyqorǵan" ındýstrıaldy aımaǵynan jer bólip, jınaqtaý tsehyn ashýdy usyndy. Bul usynysty qup kórgen Ózbekstan Premer-mınıstriniń orynbasary Nodır Otajonov Tashkent traktorlarynyń Qazaqstan naryǵyndaǵy suranysyn zerdelep, tıimdiligin anyqtaý úshin arnaıy jumys tobyn jiberetindigin alǵa tartty. Qazir zaýyt jylyna 6 myń aýylsharýashylyq tehnıkalaryn shyǵarýda. Salystyrmaly túrde alǵanda byltyr bul kórsetkish 1,5 myń danany quraǵan.
Budan keıin Amandyq Batalov bastaǵan bıznesmender Qazaqstannyń Ózbekstandaǵy elshiliginiń qoldaýymen ótkizilgen bıznes forýmǵa qatysty. Munda negizinde Almaty oblysynyń ınvestıtsııalyq áleýeti sóz bolyp, jetisýlyq zaýyt-fabrıkalardyń jumystary tanystyryldy.
Aıta keteıik, byltyr Almaty oblysy men Ózbekstan Respýblıkasy arasyndaǵy saýda-sattyq kólemi 36 mıllıon AQSh dollaryn quraǵan. Oblys kásipkerleri 15,8 mln dollardy quraıtyn taýar eksporttasa, ımport - 20,2 mln dollarǵa jetken. Osy oraıda, ózara yntymaqtastyqty, saýda-sattyqty arttyrýdyń ońtaıly jolyn izdegen qos tarap, birqatar jobalardy talqylap, basyn ashyp aldy.
Sondaı-aq, jańadan boı kótergen Tashkenttegi Qazaqstan elshiliginiń aýlasyna aǵash otyrǵyzǵan Amandyq Batalov jańa ǵımaratta Jetisý óńiriniń jeke bólmesi ázirlenip, kásipkerlerdiń kelissóz júrgizýlerine múmkindik týǵanyn atap ótti. Ózbekstandaǵy resmı sapardyń alǵashqy kúni Almaty oblysynyń mádenıet kúnderiniń ashylý saltanatymen qorytyndylanyp, 900 oryndyq "Túrkistan" kontserttik zalynda jetisýlyq ónerpazdardyń merekelik kontserti ótti. Shara aıasynda ózbek aǵaıyndarǵa ulttyq qolónerimiz jaıly syr shertetin kórme uıymdastyrylyp, Altyn adamnyń áshekeı buıymdary kópshiliktiń nazaryna usynyldy.
