Almaty oblysy: Órtten mert bolǵan otbasylardyń artynda 10 bala jetim qaldy
TALDYQORǴAN.QazAqparat - Almaty oblysynyń Panfılov aýdanynda dala órtin óshirmek bolyp, jan tapsyrǵan Qanat Úsenbekov pen Erkinbek Ospanovtyń artynda 10 balasy jetim, jarlary jesir qaldy. Eki er azamattyń da bes balasy bar, dep habarlaıdy QazAqparat tilshisi.
Qanat Úsenbekov Panfılov aýdandyq ákimdiginde kólik júrgizýshi bolyp jumys istegen. Qaıǵyly jaǵdaı bolǵan sátte ol eńbek demalysynda júrgen. Ákesiniń aıtýynsha, Qanat órtti óshirýge erikti bolyp barǵan.
«Bizde meshit salyp jatyr. Meshit salǵanda meshitke zal salǵanbyz. Tapqan aqshamyzdy sol zalǵa kómek beremiz dep barǵan bolatyn. Olar jeke aqsha tabamyz, jeke aqsha alamyz dep barǵan joq»,- dedi Marqum Qanat Úsenbekovtiń ákesi Aryp Úsenbekov.
Dala órtin óshirip, tapqan aqshasyn meshittiń qurylysyna qosýǵa nıettengen 35 jastaǵy Qanat qyzyl jalynnyń ortasynda jan tapsyrdy. Marqumnyń artynda bes birdeı balasy, jary qaldy. Úlkeni 12 de bolsa, kishisi birge endi keledi eken. Marqum kúni keshe ǵana kenjesiniń toıyna daıyndalyp, qoıyn da alyp qoıypty. Biraq ol qoı toıǵa buıyrmady dep týystary egilip jylaýda.
«Úsh qoı alyp, qyzynyń bir jas toıyn jasaımyn degen bala ǵoı. Qalaısha daıyndyqsyz, eshqandaı órtke qarsy tura almaıtyn, eshqandaı ınstrýtsııadan ótpegen balalardy qalaısha ol jaqqa jiberip qoıady. Úkimet tarapynan aıtý kerek qoı, sender daıyn emessińder, qalaı barasyńdar dep aıtý kerek qoı»,-dep kúıinedi marqum Qanat Úsenbekovtyń týysy Tolqyn Qusaıynova.
Qaza bolǵan jandardyń biri Lesnovka aýylynyń 51 jastaǵy turǵyny Aıtqazy Nemeltaev. Ákimdiktiń málimetinshe, marqum otbasyn qurmaǵan, jumyssyz. Al ormanshy bolyp jumys istegen 32 jastaǵy Erkinbek Ospanovtyń da artynda bes balasy, jary qaldy.
Esterińizge sala keteıik, 5 tamyr kúni Panfılov aýdanynda dala órtin óshiremin dep qaza tapqan úsh adamnyń ekeýi búgin jer qoınyna tapsyryldy. Buǵan deıin, órtten úsh adamnyń qaza taýyp, 7 adamnyń zardap shekkenin habarlaǵan bolatynbyz. Almaty oblysy ákiminiń baspasóz Ǵalymurat Júkeldiń málimetinshe, marqum bolǵan úsh azamat memlekettik nagradaǵa usynylady.
