Almaty oblysy: Ógeı áke úsh jasar qyzyn tistelep, murnyn julyp aldy
TALDYQORǴAN. QazAqparat - Almaty oblysynda ógeı ákesi úsh jasar qyzynyń denesin aıaýsyz tistelep, murnyn julyp alǵan, dep habarlaıdy QazAqparat tilshisi.
«Fotodaǵy úsh jasar qyzdyń ústinen saý tamtyq joq. Basynan bashpaıyna deıin aıaýsyz tistelep, bir ýys tóbe shashy múldem joq. Eń soraqysy uıyqtap jatqan bópeniń murnyn 1986 jyly týǵan Rınat Qońqabaev tistep, julyp alǵan. Álde jep qoıdy ma, kim bilsin. Muryn eti sol kúıi tabylmady. 20 kún aýrýhanada jatqan Jansaıa búgin anasymen úıge qaıtýy kerek. Alaıda, basar taý, barar jeri joq. Páterge oralsa azamattyq jary Rınat kútip otyr. Bul máselege qatysty balaǵa shabýyl dep aryz jazylǵanymen kúdikti ızolıatorda bir kún otyryp, bosap shyqty», - dep jazdy Feısbýktegi paraqshasyna jýrnalıst Gúlmıra Abyqaı.
Sondaı-aq ol úsh jasar qyzdy aıaýsyz tistelegen adam buryn sottalǵan azamat ekenin aıtqan. Almaty oblystyq ІІD baspasóz qyzmetiniń ókili Kóbeıhan Nurahmetov atalǵan oqıǵany rastady.
«Oqıǵa Talǵar aýdanynda bolǵan. 2017 jyldyń 25 jeltoqsanynda aryz kelip túsken. Qazir bul fakti boıynsha qylmystyq is qozǵalyp, tergeý amaldary júrgizilip jatyr. Qajetti sot-medıtsınalyq saraptamalar taǵaıyndaldy. Al kúdikti eshqaıda ketpeý týraly qolhatpen bosatyldy. Qazir atalǵan fakti oblystyq ІІD basshylyǵynyń tikeleı qatań baqylaýynda», - dedi Kóbeıhan Nurahmetov.
