Almaty oblysy men ShQO Dostyq úıleri yntymaqtastyqqa ázir
ShQO boıynsha Qazaqstan halqy Assambleıasy hatshylyǵynyń meńgerýshisi Erkinbek Aıazbaev Shyǵys Qazaqstan jáne Almaty oblystary dostyq úıleriniń arasynda praktıkalyq baı tájirıbe jınaqtalǵanyn atap ótti. Dóńgelek ústeldegi kezdesýler eki oblys arasyndaǵy ulttyq mádenı ortalyqtar men dostyq úıleri arasyndaǵy burynǵydan da tyǵyz baılanystardy jolǵa qoıýǵa jáne birlesken jumystyń basymdyqty baǵyttaryn pysyqtaýǵa kómektesetin bolady.
«Shyǵys Qazaqstan oblysynda toǵyz Dostyq úıleri jumys jasaıdy, olar qalalarda ǵana emes, aýdandarda da bar. Óskemende respýblıkada alǵashqy bolyp etnoaýyl ashyldy, «Assambleıa habarshysy» sııaqty merzimdi baspasóz quryldy, ǵylymı-sarapshylyq top jumys isteıdi. Jıyrma jylǵa jýyq ýaqyt buryn Dostyq úılerin qurý jónindegi jumystar bastalǵan bolatyn, endi biz ardagerlerimizdiń ıgilikti jumystarynyń jemisin kórip otyrmyz. Olardyń salyp ketken berik irgetasynyń arqasynda úlken nátıjelerge qol jetkizdik. Biz óńirimizde turatyn ártúrli ulystardy biriktire aldyq, olar elimizdegi beıbitshilik pen kelisimdi nyǵaıtýǵa óz úlesterin qosýda, - dedi Erkinbek Aıazbaev. - Sonymen birge oblystyń etnomádenı ortalyqtary Reseı, Qytaı, Mońǵolııa jáne Tatarstan sııaqty basqa memleketterdiń shekaralyq aımaqtarymen belsendi yntymaqtasýda».
Kezdesý qojaıyndary Almaty delegatsııasynyń ókilderine RF-nyń Altaı ólkesimen, Tatarstannyń kóptegen óńirlerimen tyǵyz yntymaqtasyp otyrǵany týraly áńgimeledi. Tatar mádenı ortalyǵynyń tóraıymy Kamılııa Ismaılova jáne orys áleýmettik-mádenı ortalyǵynyń tóraıymy Nadejda Kozyreva yntymaqtastyqtyń bul qyrlary qalaı nyǵaıyp otyrǵany jaıly áńgimeledi.
Óz kezeginde Almaty oblysy QHA tóraǵasynyń orynbasary Ǵabıt Tursynbaı shyǵysqazaqstandyqtarǵa Almaty oblysy Dostyq úıleriniń damý tarıhy týraly aıtyp berdi jáne etnobirlestiktermen jumystaǵy jetistikterimen bólisti, eki oblystyń odan ári yntymaqtastyǵynyń joldaryna basa nazar aýdaryldy. «Búgin Semeıge 50 adamnan turatyn úlken delegatsııa keldi, olardyń arasynda Dostyq úıleriniń basshylary, QHA músheleri jáne etnomádenı ortalyqtar ókilderi jáne bizdiń aqsaqaldarymyz bar. Eki óńirdiń ortaq múddeleri, sonyń ishinde ekonomıkalyq, áleýmettik jáne bilim salalary bar, sondyqtan da sizdiń qalaǵa kelýimizdiń mańyzy zor», - dep atap kórsetti Ǵ.Tursynbaı.
Dóńgelek ústelden keıin Semeıdiń etnomádenı ortalyqtarynyń jetekshileri qonaqtardy qoldanbaly óner kórmesimen, ádistemelik materıaldarmen tanystyrdy, al keshke Almaty jáne Shyǵys Qazaqstan oblystary shyǵarmashylyq uıymdarynyń, estrada juldyzdarynyń úlken gala-kontserti ótti, dep áńgimeledi sharaǵa qatysýshy Antonına Botıachkova.
