Almaty oblysy men Mysyr provıntsııasy arasynda yntymaqtastyq týraly kelisimge qol qoıyldy
ALMATY. QazAqparat - Búgin Almatyda Mysyr men Qazaqstan arasynda týrıstik salada yntymaqtastyqtyń jańa kezeńine arnalǵan baspasóz máslıhaty bolyp ótti.
Jýrnalıstermen kezdesýge Mysyrdyń Qazaqstandaǵy elshisi Haıtam Gamıl Kamal, Mysyrdyń Týrızm ákimshiligi bóliminiń basshysy Ahmed Shýkrı, Ońtústik Sınaı provıntsııasynyń gýbernatory Halıd Fýda, Almaty oblysy ákiminiń orynbasary Serik Turdálıev jáne Qazaqstan men Mysyrdyń týrızm, qonaq úı bıznesi salasynda qyzmet atqaratyn kompanııa basshylary qatysty.
Kezdesý barysynda Almaty oblysy men Mysyrdyń eń tanymal týrıstik mekenderiniń biri - Ońtústik Sınaı provıntsııasy arasynda Yntymaqtastyq týraly memorýndamǵa qol qoıyldy.
«Bul kelisimniń arqasynda Qazaqstan men Mysyr arasynda, ásirese týrıstik saladaǵy qarym-qatynas jańa deńgeıge kóteriledi dep oılaımyn. Bul jerde búgingi kelisimniń alar orny erekshe. Óıtkeni, Almaty oblysy Qazaqstandaǵy eń úlken, ekonomıkasy damyǵan jáne halyq kóp shoǵyrlanǵan óńirleriniń biri. Munda erekshe tarıhı oryndar kóp. Ońtústik Sınaı da Mysyrdyń eń betke ustar provıntsııalarynyń biri. Munda búkil álemge tanymal Sharm-el-Sheıh shıpajaıy ornalasqan», - dedi Mysyrdyń Qazaqstandaǵy elshisi Haıtam Gamıl Kamal.
Óz kezeginde Almaty oblysy ákiminiń orynbasary Serik Turdyálıev bul kelisim eki el arasynda týrıstik baılanystyń damýyna jańa serpin beretindigin aıtty.
«Bul kelisimge qol qoıý biz úshin úlken qurmet. Endi Almaty oblysy men Ońtústik Sınaı arasynda týrızm, bilim, mádenıet, óner, ekologııa salasyndaǵy yntymaqtastyq damı túsedi degen senimdemin. Sonymen qatar, bul kelisim eki eldiń týrıstik kompanııalary arasynda seriktestik qarym-qatynastyń nyǵaıýyna negiz bolady», - dedi S. Turdyálıev.
Aıta ketelik, sońǵy 60 jyl ishinde álemde týrıster sany bir jylda 25 trıllıonnan 1 mıllıard adamǵa deıin artqan. Bul sala turaqty túrde damyp jatyr. Qazirgi tańda jer sharynyń árbir 11-shi turǵyny týrızm salasynda qyzmet etedi.
Al Qazaqstannan Mysyrǵa baratyn týrıster sany da jyldan jylǵa arta túsýde. Byltyr Mysyrǵa bizdiń elden 22 myńnan astam adam týrıstik saparmen baryp qaıtqan.
