Almaty oblysy men Irannyń BAQ ókilderi ózara tájirıbe almasady
TALDYQORǴAN. QazAqparat - Búgin Taldyqorǵanda Almaty oblysynyń ishki saıasat basqarmasy men Iran Islam Respýblıkasynyń Bas konsýldyǵy janyndaǵy Mádenı ókildik arasynda yntymaqtastyq týraly memorandýmǵa qol qoıyldy. Mańyzdy qujat alty baǵyt boıynsha júzege asady dep josparlanýda. Bul jóninde QazAqparat tilshisi habarlaıdy.
Birinshiden, BAQ ókilderi, blogerler arasynda ekijaqty tájirıbe almasý, sheberlik dárister jáne kásibı biliktiligin joǵarylatý úshin halyqaralyq konferentsııalar, sımpozıýmdar, semınar-trenıngterge qatysý jáne ótkizý kózdelýde. Ekinshiden Ultaralyq jáne dinaralyq shıelenisti joıýdaǵy oń tájirıbeni qoldaný arqyly qarym-qatynasty nyǵaıtý. Sondaı-aq qoǵamda etnosaralyq kelisimdi jáne toleranttyqty odan ári nyǵaıtý úshin qolaıly jaǵdaılar jasaý. Sonymen qatar, qujattyń taǵy mańyzdy bóliginiń biri týrızm salasyna baǵyttalǵan. Aıasynda eki eldiń tarıhyn, ónerin, mádenıetin, kórikti jerlerin tanystyrý jaǵy qarastyrylyp otyr.
"Bul bizdiń Taldyqorǵan qalasyna birinshi ret kelýimiz. Degenmen aldaǵy ýaqytta kıno festıvaldary men Iran ónerpazdarynyń kontsertterin uıymdastyratyn bolamyz. Sondaı-aq ózge de mádenı sharalardy birge ótkizýge daıynbyz", deıdi Iran Islam Respýblıkasynyń Bas konsýldyǵy janyndaǵy Mádenı ókildik dırektory Seıed Djavad.
Esterińizge sala keteıik, búgin Taldyqorǵanda Iran Islam Respýblıkasynyń mádenıet kúni ótip jatyr. Qaladaǵy Jýrnalıster úıinde atalǵan eldiń tarıhynan syr shertetin arnaıy kórme uıymdastyrylǵan. Sondaı-aq, qonaqtarǵa mádenı-demalys ekskýrsııasyn uıymdastyrý josparlanýda. Shara aıasynda olar jańadan boı kótergen nysandardy aralap, tarıhı-ólketaný murajaıynyń tynys-tirshiligimen tanysady.
