Almaty oblysy: metsenat muqtaj jandarǵa úı salyp berdi

TALDYQORǴAN. QazAqparat - Búgin Almaty oblysy Qarasaı aýdanyndaǵy Shamalǵan aýylynda áleýmettik áljýaz toptar sanatyndaǵy otbasylar men múgedek jandar jańadan salynǵan jeke turǵyn úılerdiń kiltterine ıe boldy. Jekemenshik turǵyn úılerdi «Týǵan jer» jobasyna oraı metsenattardyń biri jeke qarjysyna turǵyzǵan, dep habarlaıdy QazAqparat oblys ákiminiń baspasóz qyzmetine silteme jasap.

Turǵyn úı kiltterin osy úılerdi óz qarajatyna salǵan «BN INVEST» qarjylyq-óndiristik kompanııasy» JShS prezıdenti Bolat Nazarbaev tabystady.

Saltanatty shara barysynda qonys ıelerine Shamalǵan aýlynyń turǵyny Myrzabek aqsaqal bata berip, Almaty oblysynyń ákimi Amandyq Batalov jyly lebizin bildirdi.

Turǵyn úıge qol jetkizgen azamattardyń biri, múgedek jan Raqym Saǵyndyqov. «Mundaı ıgilikti isti atqarǵan azamattarǵa aıtar alǵysymyz sheksiz. Týǵan jerin túletý, muqtaj jandarǵa qol ushyn berý - úlgi alarlyq is, úlken júrekti adamnyń ǵana qolynan keletin jomarttyq», - dedi ol.

Shamalǵan aýylynda ornalasqan 17 turǵyn úıdiń qurylysyna 124,5 mln. teńgege jýyq qarajat jumsalǵan. Budan bólek, ınjenerlik júılermen qamtýǵa ketken qarjynyń ózi 35 mln. teńgeden asady. Bıylǵy jyldyń sáýir aıynda bastalǵan qurylys jumystary nebári 5 aıdyń ishinde tolyǵymen aıaqtalyp, kóptiń ıgiligine usynylyp otyr. Ortalyqtandyrylǵan gaz, sý júıelerine qosylyp, elektrmen qamtamasyz etilgen ár úıdiń aýmaǵy 120 sharshy metrdi quraıdy.

Aıta keterligi, atalmysh turǵyn úılerge sý júıesin júrgizý barysynda ıgi istiń sharapaty ózgelerge de tıip, qurylysqa jaqyn ornalasqan taǵy 75 úı de ortalyqtandyrylǵan sý júıesine metsenat esebinen qosylǵan.