Almaty oblysy Qytaıdyń Sychýan provıntsııasymen yntymaqtastyqty damytpaq
TALDYQORǴAN.QazAqparat - Almaty oblysy men QHR-dyń Sychýan provıntsııasynyń arasynda dostyq qarym-qatynas ornatý týraly kelisimge qol qoıyldy, dep habarlaıdy QazAqparat oblys ákiminiń baspasóz qyzmetine silteme jasap.
Taraptar ekonomıka, saýda, mádenıet, sport, densaýlyq saqtaý salalaryndaǵy yntymaqtastyqty damytýdy josparlap otyr. Bul týraly oblys ákiminiń mindetin atqarýshy Lazzat Turlashovtyń Sychýan provıntsııasynan kelgen delegattarmen kezdesýi barysynda aıtyldy.
Kezdesý barysynda L. Turlashov óńir ekonomıkasyn, sonyń ishinde agroónerkásiptik keshen salasyn damytýdyń basymdyqtaryn atap ótti. Olardyń qatarynda sútti jáne etti baǵyttaǵy mal sharýashylyǵyn ındýstrıalandyrý, qant óndirisi, sol sııaqty ıntensıvti baqtardyń alańyn ulǵaıtý sharalary bar. Sonymen qatar L. Turlashov oblystyń qolaıly ınvestıtsııalyq klımaty men ınvestorlarǵa ashyqtyǵyn da tilge tıek etti.
Óz kezeginde delegatsııany bastap kelgen Sychýan provıntsııasynyń Halyqtyq saıası konsýltatıvtik keńesi tóraǵasynyń orynbasary Gao Fen uıymdastyrylǵan kezdesý úshin rızashylyǵyn bildirip, Sychýan provıntsııasynyń áleýmettik-ekonomıkalyq órkendeýi jaıly baıandady. Sondaı-aq provıntsııada aýyl sharýashylyǵy salasy jaqsy damyǵanyn aıtyp ótti. Sondyqtan eki taraptyń da yntymaqtastyq ornatýdaǵy áleýeti mol.
Kezdesý sońynda qos tarap ózara eki jaqty yntymaqtastyq týraly memorandýmǵa qol qoıdy.
