Almaty oblysy: Eki jyl izdeýde júrgen kúdikti qolǵa tústi
TALDYQORǴAN.QazAqparat - Almaty oblysynyń polıtseıleri eki jyl izdeýde bolǵan kúdiktini qolǵa túsirdi. Oqıǵa Qapshaǵaı qalasynda bolǵan, dep habarlaıdy QazAqparat tilshisi.
Jańa stadıon mańynda qydyryp júrgen otbasy bir top jastyń daýlasyp jatqanyn baıqaıdy. Kólikterine minip, jyldam ketip qalýǵa árekettengen kezde eki ret myltyq atylyp, bytyranyń qańǵyrǵan oǵy aldyńǵy oryndyqta otyrǵan 10 jastaǵy jasóspirim qyzdyń basyna tıedi. Ata-anasy ony jedel túrde qalalyq aýrýhanaǵa jetkizgen.
«Osy buzaqylyq deregine qatysy bar degen kúdikke ilingen 1990 jylǵy Taldyqorǵan qalasynyń turǵynyna izdeý jarııalanǵan. «Quqyqtyq tártip» jedel aldyn alý is-sharasy barysynda kúdikti Almaty qalasynda ustalyp, Qapshaǵaı qalasy polıtsııasynyń ýaqytsha ustaý oqshaýlaǵyshyna qamaýǵa alyndy»,- dep málimdedi oblystyq Polıtsııa departamentiniń baspasóz qyzmeti.
Vedomstvo taratqan aqparatqa sáıkes, derek boıynsha QR Qylmystyq kodeksiniń 293-babyna oraı sotqa deıingi tergeý amaldary júrgizilýde. Zardap shegýshi jasóspirim dárigerler kómeginen keıin úıine jiberildi.
