Almaty oblysy: Denege sýret salatyn jigit 25 jastaǵy qyzdy óltirdi degen kúdikpen ustaldy
TALDYQORǴAN.QazAqparat - Almaty oblysynda denege sýret (tatýırovka) salatyn jigit 25 jastaǵy qyzdy óltirdi degen kúdikpen ustaldy. Oqıǵa Qarasaı aýdanynda bolǵan, dep habarlaıdy QazAqparat tilshisi.
Polıtseıler eki jergilikti turǵyndy ustady. Olardyń bireýi kisi óltirýge, ekinshisi ony jasyrǵany ıaǵnı qylmys jóninde habarlamaǵany úshin tergelýde.
Almaty oblystyq Polıtsııa departamenti baspasóz qyzmetiniń málimetinshe, 24 qyrkúıek kúni Qarasaı aýdandyq polıtsııa basqarmasyna Qaskeleń qalasynyń turǵyny 25 jastaǵy ápkesiniń joǵalǵany týraly aryzdanǵan. Іz-túzsiz joǵalǵan áıeldi izdeý úshin aýdandyq jáne oblystyq polıtsııa qyzmetkerleri jumyldyrylǵan. Sonymen qatar, onyń joǵalýyna baılanysty Qarasaı aýdandyq polıtsııasy QR QK 99 baby boıynsha qylmystyq is qozǵady.
«Іzdeý salynǵan kólik kóp uzamaı Áıteı aýylynyń mańynda janyp ketken kúıinde tabyldy. Jedel-izdestirý is-sharalary barysynda kúdikti óziniń sybaılasymen birge ustaldy. Ustalǵan adamdar taýly aımaqtan jábirlenýshiniń máıiti jerlengen oryndy kórsetti»,-dep málimdedi Almaty oblystyq PD baspasóz qyzmeti.
Kisi óltirgen kúdikti 22 jastaǵy jas jigit denege sýret salatyn salondardyń birinde isteıtini belgili boldy. Qylmys kúdiktiniń jumys ornynda jasalǵany anyqtaldy. Al oqıǵanyń qalaı bolǵanyn polıtsııa sotqa deıingi tergeý barysynda anyqtaıdy.
«Kúdiktige dos bolyp keletin ekinshi ustalǵan adamnyń ústinen QR QK 434-baby boıynsha aıyp taǵylady. Qazir osy fakti boıynsha qajetti saraptamalar taǵaıyndaldy. Eki kúdikti de kúzetpen baqylaýda», - dep atap ótti oblystyq polıtsııa departamentiniń baspasóz qyzmeti.
