Almaty oblysy boıynsha 411 sottalýshyǵa raqymshylyq jasalady

TALDYQORǴAN. QazAqparat - «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» zańy Almaty oblysy boıynsha 411 sottalýshyǵa áseri bolady. Bul týraly QazAqparat tilshisiniń resmı saýalyna jaýap bergen oblystyq Qylmystyq atqarý júıesi departament bastyǵy mindetin atqarýshy Bolat Júnisov málim etti.

«Raqymshylyq týraly zańnyń kúshi resmı túrde 411 adamǵa áser etedi. Sonyń ishinde 2 sottalýshy bostandyqqa shyǵady. Qalǵan 30 adamǵa  jazanyń ótelmegen bóligi neǵurlym jeńil jaza túrine aýystyrylsa, úkimde kórsetilgen basqa da talaptary tolyqtaı ótelgen 379 sottalýshynyń jazasy qysqartylady», - delingen resmı jaýapta.

Eske sala keteıik, «Qazaqstan Respýblıkasy Táýelsizdiginiń 25  jyldyǵyna baılanysty raqymshylyq jasaý týraly» Zańy qylmystyq quqyq buzǵan azamattarǵa qatysty izgilik aktisi, memleket tarapynan meıirimdilik pen senim bildirýdiń kórinisi bolyp sanalady. 

Zańǵa sáıkes, azamattardyń áleýmettik álsiz toptary, sonyń ishinde kámeletke tolmaǵandar, júkti áıelder, kámeletke tolmaǵan nemese múgedek balalary bar áıelder, múgedekter, qart adamdar, sondaı-aq aýyr emes qylmystyq quqyq buzýshylyqtar jasaǵandar qylmystyq jazadan bosatylady. Jazanyń ótelmegen bóligin aıyppulmen nemese bostandyǵyn shekteýmen almastyrý nemese qysqartý da kózdelgen.

Budan buryn habarlanǵandaı, raqymshylyqqa Qazaqstan boıynsha 28 myń adam iligýi múmkin.  Bul rette aıyppul sharasyna, shartty jazaǵa kesilgender, qoǵamdyq jumystarǵa jáne basqa da aýyr emes jazaǵa tartylǵandar qamtylatyn bolady. Belgili bolǵandaı, lańkestik jáne basqa aýyr qylmys jasaǵandar raqymshylyqqa ilikpeıdi. Negizi raqymshylyq jasaý asa aýyr emes qylmystarǵa, jasóspirimderge, júkti áıelderge jáne qoǵamdyq qaýiptiligi joq qylmystarǵa kózdelgen. Sonymen qatar, raqymshylyq aıasynda bas bostandyǵynan aıyrý oryndarynan 1500 adam bosap shyǵady.