Almaty oblysy bıylǵy jyly 35 myń tonna qant alady
TALDYQORǴAN.QazAqparat - Almaty oblysynda bıylǵy jyly qant qyzylshasynyń alqaby 9 myń gektarǵa jetti. Odan 350 myń tonna, ıaǵnı rekordtyq ónim alynady dep josparlanyp otyr.
Bul týraly oblys ákimi Amandyq Batalov Ortalyq kommýnıkatsııalar qyzmetinde ótken brıfıng kezinde aıtty, dep habarlaıdy QazAqparat tilshisi.
Atap ótsek, Kóksý qant zaýyty úsh jyl qatarynan jańǵyrtýdan ótti, 10 jyl toqtap turǵan Aqsý qant zaýyty bıylǵy jyly qalpyna keltirilip, 40 myń tonna qant qyzylshasyn qabyldady. «Jetisý» ÁÁK-ni tarta otyryp, 18 servıstik daıyndaý ortalyqtary quryldy. Osynyń barlyǵy qant óndirisine oń yqpal etetin bolady. Zamanaýı aýyl sharýashylyǵy tehnıkalary men elıtalyq tuqym paıdalanýdyń nátıjesinde jekelegen sharýa qojalyqtarynda ónim ár gektarynan 500-700 tsentnerge deıin jetýde. Sóıtip, bıylǵy jyldyń ónimi 350 myń tonnany quraıdy dep boljanyp otyr.
«35 myń tonna qant alsaq, óńirdiń qantqa degen suranysyn tolyq jaba alamyz. Bizdiń maqsatymyz - oblystyń ǵana emes, elimizdiń qantqa degen qajettiligin tolyq qamtamasyz etý», - dedi A. Batalov.
