Almaty oblysy Azıada úshin laıyqty seriktes bolady jáne biregeı sporttyq baza daıyndaıdy - aımaq ákimi
TALDYQORǴAN. 6 jeltoqsan. QazAqparat /Sandýǵash Dúısenova/ - Almaty oblysynyń ákimi Serik Úmbetov juma, 3 jeltoqsan kúni Talǵar aýdanyna kezekti jumys saparyn jasady. Bul sapardyń maqsaty - aıaqtalyp kele jatqan jáne oblys úshin ǵana emes, búkil respýblıka úshin mańyzdy birqatar sport nysandaryn aralaý boldy.
Atap aıtqanda, ákim Soldat shatqalyndaǵy «Aq bulaq» taý kýrorty mańyndaǵy shańǵy bıatlon kesheninde, Besqaınar aýylyndaǵy «Tabaǵan» sporttyq-saýyq keshenindegi frıstaılǵa arnalǵan alańda jáne «Arystan» mamandandyrylǵan lıtseıde boldy.
Bul nysandardyń qurylystary oblys ákimdiginiń jiti nazarynda. Esterińizge sala keteıik, jańa sporttyq nysandar kelesi jyldyń basynda ótetin Azıadaǵa arnap salynýda. Al «Arystan» kadet korpýsy - «Nursultan Nazarbaevtyń Bilim qory» qoǵamdyq qorynyń uıytqy bolýymen júzege asyrylyp jatqan joba.
Ákimniń baspasóz qyzmetinen habarlaǵandaı, ákim saparyn shańǵy-bıaotlon kesheniniń stadıonynan bastady. Teńiz deńgeıinen 1600 metr bıiktikke ornalasqan stadıonnyń aýdany - 24,5 gektardyń shamasynda. 3 myń kórermen sııatyn stadıon jobasynyń smetalyq quny - 13 mıllıard teńge. Tapsyrys berýshi - Týrızm jáne sport mınıstrligi.
9 jeltoqsanda bul keshenge Úkimet basshysy Kárim Másimov keledi jáne odan keıin Qazaqstan Kýbogy úshin jarystar ótedi dep kútilýde.
Ákim at basyn tiregen ekinshi sporttyq nysan - «Tabaǵan» aýmaǵynda ornalasqan frıstaıl alańy boldy. Bul jobanyń smetalyq quny - 185,3 mıllıon teńge.
S.Úmbetov sapar aıasynda sondaı-aq, qurylysy aıaqtalyp qalǵan «Arystan» lıtseıimen tanysty.
Sapar sońynda S.Úmbetov qarap shyqqan keshenderdiń mańyzdylyǵyna taǵy bir ret toqtaldy jáne Almaty oblysynyń Azıada úshin laıyqty seriktes bola alatyndyǵyna senim bildirdi.
