Almaty oblysy ákiminiń orynbasary jappaı ereýil kezinde soqqyǵa jyǵyldy

TALDYQORǴAN. QazAqparat – Almaty oblysy ákiminiń orynbasary Lázzat Turlashov mıtıng kezinde soqqyǵa jyǵyldy. Bul týraly óńir ákiminiń keńesshisi Ǵalymurat Júkel aıtty, dep habarlaıdy QazAqparat.

Sonymen birge, keńesshi ákimniń orynbasary qaıtys boldy degen aqparatty resmı túrde joqqa shyǵardy.

«Bul aqparatty resmı túrde joqqa shyǵaramyn jáne onyń aman ekenin aıtqym keledi. Ol 5 qańtarda tártipsizdik kezinde jaraqat aldy. Onymen sóılestim, qazir em alyp jatyr. Jaǵdaıy turaqty», - dedi ákimniń keńesshisi.

Onyń aıtýynsha, oblystaǵy jaǵdaı turaqtanyp keledi, Taldyqorǵan qalasynyń perımetri boıynsha jáne qala ishinde blokpostar qoıylǵan.

Árbir avtokólik pen adam tekserilip jatyr.

Ákimniń keńesshisi qala turǵyndarynan májbúrli sharalarǵa túsinistikpen qaraýdy jáne úıden shyqpaýdy, komendatýranyń barlyq talaptaryn saqtaýdy suraıdy.

Odan bólek, Ǵalymurat Júkel tártipsizdik kezinde iri azyq-túlik haby bolyp sanalatyn «Altyn orda» bazary zardap shekkenin aıtty.

Qazir bazar jumys istep tur, onda qaýipsizdik sharalary kúsheıtilgen.

Eske sala keteıik, qazirgi ýaqytta Almaty oblysynda kúsh qurylymdarynyń lańkestikke qarsy operatsııasy jalǵasyp jatyr.