Almaty oblysy ákimdiginiń qyzmetkeri merekelik is-sharadan keıin qaıtys boldy
ALMATY. QazAqparat – Almaty oblysynyń turǵyny dástúrli Agro-Business Forum Assy-2023 forýmynan keıin qaıtys boldy, dep habarlaıdy QazAqparat tilshisi.
Almaty oblysy ákimdigi baspasóz qyzmetiniń málimetinshe, keshe 30 maýsym kúni Eńbekshiqazaq aýdanynda jyl saıynǵy dástúrli Agro-Business Forum Assy-2023 forýmy ótti. Aýqymdy is-shara aıaqtalǵannan keıin qatysýshylardyń biri ózin nashar sezingen. Taýda kezekshilikte bolǵan feldsherler oǵan shuǵyl medıtsınalyq kómek kórsetken, alaıda er adam esin jımastan qaıtys boldy. Almaty oblysynyń ákimdigi marqum Báıterek aýyldyq okrýgi ákimi apparatynda bas maman bolyp jumys istegenin málimdedi. Sol kúni ol merekelik sharaǵa demalýshy retinde barǵan.
«Asy ústirti – teńiz deńgeıinen 2800 metrden astam bıiktikte ornalasqan jaılaý. Osy jaıt onyń densaýlyǵynyń nasharlaýyna sebep bolýy múmkin. Áriptestiń qazasy – ujym úshin orny tolmas qaıǵy. Marqumnyń otbasyna materıaldyq kómek kórsetiledi», – dep habarady Almaty oblysy ákimdiginiń baspasóz qyzmetinen. Buǵan deıin Almaty oblysynda jylan shaǵyp alǵan 9 jasar balanyń qaıtys bolǵany týraly jazǵan edik.
