Almaty oblysy ákimdigi kómir tapshylyǵyn qoldan uıymdastyrǵandardy izdestirýde
TALDYQORǴAN. QazAqparat - Almaty oblysynyń ákimi Amandyq Batalov oblys aýmaǵynda kómir máselesin sheshýdi tapsyrdy. Óńir basshysy alyp-satarlar qatty otyn tapshylyǵyn qoldan uıymdastyryp, baǵany jasandy qymbattatyp otyrǵandarmen kúresý qajettigin atap ótti, dep habarlaıdy QazAqparat tilshisi.
Amandyq Batalov sońǵy kúnderi birqatar buqaralyq aqparat quraldarynda Taldyqorǵan jáne Esik qalalarynda kómir tapshylyǵy týraly synı materıaldar jaryqqa shyqqanyn aıtyp ótken bolatyn.
«Osyǵan oraı jaýapty qyzmetkerlerdiń kómir satylatyn jerler men temirjol tuıyqtarynda kezekshilik uıymdastyryp, baqylaýǵa alýdy tapsyramyn», - dedi ol. Al jumysty qadaǵalaýdy orynbasary Aıdarbek Baıjanovqa mindettedi. Sondaı-aq Batalov jasandy jolmen qatty otyn tapshylyǵyn uıymdastyryp, halyqty dúrliktirgenderdi jaýapqa tartý qajettigin atap ótti.
Oblys ákiminiń tapsyrmasyn oryndaý maqsatynda Aıdarbek Baıjanovtyń basqarýymen arnaıy jumys toby quryldy. Olar Eńbekshiqazaq aýdanyndaǵy kómir qoımalaryndaǵy jaǵdaıdy tekserý úshin Esik qalasyna bardy. 25 qańtarda Esik qalasynda 120 tonna qatty otyn qory bar ekeni anyqtaldy. Eńbekshiqazaq aýdanynda temirjol tuıyqtarynyń joqtyǵynan kómir Almaty qalasy men jaqyn aýdandardan júk kólikterimen tasymaldanady. Qalaǵa kúndelikti 120 tonna kómir jetkiziledi. Aýdan ákimdiginde de kómir tapshylyǵyn joıýǵa baǵyttalǵan arnaıy shtab quryldy. Al oblystyq Energetıka jáne TÚKSh basqarmasynyń basshysy Áset Qanaǵatov budan bylaı aýdanǵa kún saıyn 200 tonna kómir jetkizilip turatynyn málimdedi.
Buǵan deıin taldyqorǵandyq turǵyndardyń alyp-satarlarǵa bildirgen narazylyqtaryn jazǵan bolatynbyz.
