Almaty oblysy: 5 adam mert bolǵan kólik apatynda aman qalǵan balaǵa arnaıy mamandar shaqyrtyldy
TALDYQORǴAN. QazAqparat - Almaty oblysynda jan túrshigerlik jol apatynan zardap shekken bes jasar qyzǵa arnaıy mamandar shaqyrtyldy, - dep habarlaıdy QazAqparat tilshisi.
Esterińizge sala ketsek, keshe Shonjy-Aqsý-Uzyntam tasjolynda qarama-qarsy kele jatqan eki kólik soǵylyp, otqa oranǵan bolatyn.
Qaıǵyly oqıǵada bes adam qaıtys bolyp, bir bala ǵana aman qalǵan. Qazirgi tańda qyz balanyń jaǵdaıy aýyr. Aıaq-qoldary synyp, bas-mı jaraqatyn alǵan. Іsh qurylysyna qatty zaqym kelgen. Jedel operatsııa jasalyp, balanyń kók baýyryn alyp tastaýǵa týra keldi. Oblystyq aýmaqtyq balalar aýrýhanasynan bilikti dárigerler shaqyrtylyp, naýqasty aman alyp qalýǵa barlyq jaǵdaı jasalyp jatyr.
«Neırohırýrg, travmatolog, reanımatolog dárigerler kelip, barlyǵynyń kómeginiń nátıjesinde qazir bala tiri. Jaǵdaıy aýyr bolsa da turaqty «,- dedi Uıǵyr aýdandyq aýrýhanasy bas dárigeriniń orynbasary Ánýar Rashıdov.
