Almaty oblysy - 42500 teńgeden eń kóp taǵaıyndalǵan óńir
NUR-SULTAN. QazAqparat - 3,4 mıllıonnan astam qazaqstandyq tótenshe jaǵdaı kezinde tabysynan aıyrylýyna baılanysty 42500 teńgeden áleýmettik tólem aldy. Bul týraly QR Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.
«3 mln 482 myń adamǵa TJ kezeńinde tabysynan aıyrylýyna baılanysty Memlekettik áleýmettik saqtandyrý qorynan (MÁSQ) áleýmettik tólem taǵaıyndaldy», - dedi mınıstrlikten.
Jalpy, 17 sáýir saǵat 11:00-degi jaǵdaı boıynsha, 42 500 teńge kólemindegi tólemge 6 mln 671 myń azamat ótinish bergen. Eń kóp ótinish Almaty oblysynan túsken – 846,5 myń. Túrkistan oblysynan – 801,6 myń, Almaty qalasynan – 784,2 myń, Nur-Sultan qalasy – 507,8 myń, Shymkent qalasy 431 myń ótinish jiberilgen.
Járdemaqy eń kóp taǵaıyndalǵan óńirlerdiń aldyńǵy qatarynda Almaty oblysy tur. Bul óńirde 42500 teńgeden 520 myń adam aldy. Túrkistan oblysynda – 415,6 myń, Almaty qalasynda 333,2 myń turǵyn aldy.
Sondaı-aq Eńbek mınıstrligi ótinishterdi qaraý merziminiń ulǵaıýyna jol bermeý maqsatynda ótinishti bir ret qana jolaýdy suraıdy.
MÁSQ-ta tólem jasaý týraly sheshim qabyldanǵannan keıin ótinish berýshige SMS-habarlama keledi. Keıinnen ótinish berýshiniń derekteri «Azamattarǵa arnalǵan úkimet» memlekettik korporatsııasy» KEAQ-ǵa jiberiledi. Ol ony ekinshi deńgeıdegi bankterge tólem júrgizý úshin jiberedi.
Áleýmettik tólem alýǵa ótinimdi eGov portaly, 42500.enbek.kz veb-saıty jáne https://t.me/Help42500Bot adresi boıynsha Telegram-bot arqyly berýge bolady.
Esterińizge sala keteıik, qoldanystaǵy Qaǵıdalarǵa sáıkes TJ kezeńinde qyzmettiń shektelýine baılanysty tabysynan aıyrylǵan jaǵdaıda bir adamǵa MÁSQ-tan aıyna 42 500 teńge mólsherinde beriletin áleýmettik tólem kelesi sanattarǵa:
– jeke kásipkerlerge jáne shaǵyn jáne orta kásipkerlik sýbektileriniń jalaqysy saqtalmaıtyn demalystaǵy qyzmetkerlerine;
– karantın engizilgen eldi mekenderde qyzmetin júzege asyratyn iri kásipkerlik sýbektileriniń jalaqysy saqtalmaıtyn demalystaǵy qyzmetkerlerine;
– memlekettik mekemelerdi qospaǵanda, kommertsııalyq emes zańdy tulǵalardyń jalaqysy saqtalmaıtyn demalystaǵy qyzmetkerlerine;
– jeke praktıkamen aınalysatyn adamdarǵa (notarıýs, jeke sot oryndaýshysy, advokat, kásibı medıator);
– QR Salyq kodeksiniń 774 babyna sáıkes, biryńǵaı jıyntyq tólemdi tóleýshiler bolyp tabylatyn jeke tulǵalarǵa;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sıpattaǵy sharttar boıynsha tabys tabatyn, salyq agentteri olar úshin mindetti zeınetaqy jarnalaryn aýdarǵan adamdarǵa taǵaıyndalady.
1-shi jáne 2-tarmaqshalar ulttyq basqarý holdıngteriniń, ulttyq holdıngter men ulttyq kompanııalardyń qyzmetkerlerine qatysty emes.
