Almaty oblysy 4 kúnnen beri dala órtimen arpalysyp jatyr
TALDYQORǴAN. QazAqparat – Almaty oblysynyń Panfılov aýdanynda tórt kúnnen beri jaıylym órtenip jatyr, dep habarlaıdy QazAqparat tilshisi.
«400-500 gektardaı jaıylymdyq jer órtendi. Qazir de órtenip jatyr. Qyzyl jalyn toǵaıǵa da jetti. 1,5-2 gektar shamasynda qaraǵaı órtendi. Tikushaqpen qyzyl jalyndy sóndirý júrip jatyr. Kúnde 50-70 adam sol oqıǵa ornynda jumys istep jatyr», - dedi Panfılov aýdany ákiminiń orynbasary Shýhrat Qurbanov.
Ákim orynbasarynyń sózinshe, órtenip jatqan jer Jarkent qalasynan 50 shaqyrym jerde taýly aımaqta ornalasqan. Ol mańǵa atpen, kólikpen jetý qıyndyq týdyrady. Biraq memlekettik qyzmetker órttiń aýyl aımaqtaryna qaýpi joq dep sendirdi.
Esterińizge sala keteıik, 5 tamyr kúni Panfılov aýdanynda dala órtin óshiremin dep qaza tapqan úsh adamnyń ekeýi búgin jer qoınyna tapsyryldy. Buǵan deıin, órtten úsh adamnyń qaza taýyp, 7 adamnyń zardap shekkenin habarlaǵan bolatynbyz. Almaty oblysy ákiminiń baspasóz hatshysy Ǵalymurat Júkeldiń málimetinshe, marqum bolǵan úsh azamat memlekettik nagradaǵa usynylady.
