Almaty oblystyq TJD-nyń burynǵy bastyǵyna sot úkimi shyqty

NUR-SULTAN. QazAqparat - Almaty oblystyq Tótenshe jaǵdaılar departamentiniń burynǵy bastyǵy jemqorlyqqa qatysty qylmysy úshin qomaqty aıyppul arqalady. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmetinen málim etti, dep habarlaıdy QazAqparat tilshisi.

Qylmysty Sybaılas jemqorlyqqa qarsy is-qımyl ulttyq bıýrosynyń Almaty oblysy boıynsha departamenti ashqan. Habarlanǵandaı, Almaty oblysynyń TJD bastyǵy bolǵan D. Baısarıevqa jáne Órt sóndirý jáne apattyq qutqarý jumystary qyzmetiniń kadr jumysy bóliminiń bastyǵy B. Omarovqa qatysty sotqa deıingi tergeý jaqynda aıaqtalǵan.

«Almaty oblysy Taldyqorǵan qalalyq sotynyń úkimimen D. Baısarıev para alýda kináli dep tanyldy. Ol memlekettik qyzmet pen jergilikti ózin-ózi basqarý organdarynda laýazymdardy atqarý quqyǵynan ómir boıyna aıyrylyp, paranyń 35 eselengen somasyn, ıaǵnı 10,5 mln teńge aıyppul tóleýge mindetteldi. Sondaı-aq ol azamattyq qorǵaý polkovnıgi ataǵynan aıyryldy. Al qylmys jasaýdaǵy sybaılasy - B. Omarov paraqorlyqta deldal bolýda kináli dep tanyldy. Ol memlekettik qyzmet pen jergilikti ózin-ózi basqarý organdarynda laýazymdardy atqarý quqyǵynan ómir boıyna aıyryla otyryp, paranyń 10 eselegen somasy - 3 mln teńge aıyppul arqalady. Sottalýshy sondaı-aq azamattyq qorǵaý podpolkovnıgi ataǵynan aıyryldy», - delingen agenttiktiń habarlamasynda.