Almaty oblystyq soty «Memlekettik tildegi eń úzdik sot otyrysy» konkýrsynyń jeńimpazy atandy

ASTANA. QazAqparat - Respýblıkalyq sot júıesinde memlekettik tildiń qoldaný aıasyn keńeıtý jáne ony nasıhattaý maqsatynda bıylǵy 15 sáýir - 15 maýsym aralyǵynda oblystyq jáne oǵan teńestirilgen sottar arasynda «Memlekettik tildegi eń úzdik sot otyrysy» respýblıkalyq konkýrs uıymdastyryldy.

Osy konkýrsqa jekelegen oblystyq jáne oǵan teńestirilgen sottar belsendi qatysyp, sapaly daıyndalǵan materıaldaryn konkýrsqa usyndy. Konkýrstyń qorytyndylaryn shyǵarý kezinde komıssııaǵa usynylǵan materıaldar jan-jaqty talqylanyp,  sheshim shyǵaryldy.

2016 jyly «Memlekettik tildegi eń úzdik sot otyrysy» atty respýblıkalyq konkýrsta birinshi oryn - Almaty oblystyq sotyna, ekinshi oryn - Qostanaı oblystyq sotyna jáne úshinshi oryn - Ońtústik Qazaqstan men Aqtóbe oblystyq sottaryna berildi.

Almaty jáne Qostanaı oblystyq sottary apellıatsııalyq sot alqasynda istiń qazaq tilinde qaraýyna oblystyq sottardyń tóraǵalary M.Taımerdenov pen A.Merǵalıevtiń ózi qatysqanyn atap ótken jón. Munyń ózi oblystyq sot tóraǵasynyń sot isteriniń memlekettik tilde júrgizilýine jaýapkershilikpen qaraıtynyn bildiredi.

Ońtústik Qazaqstan oblystyq soty apellıatsııalyq sot alqasynyń otyrysyn konkýrstyń barlyq talaptaryna saı durys túsirgen. Prokýrordyń qorytyndysy jatyq. Advokat ta qazaq tilinde jaqsy sóıleıtinin kórsetken. Sondyqtan konkýrs jeńimpazdaryn anyqtaý kezinde sońǵy oblystyq sottardyń materıaldaryna laıyqty oryn berildi.