Almaty oblystyq polıtsııa sheneýnigi tergeýge ilikti me – Bas prokýratýra jaýaby
ASTANA. QazAqparat – QR Bas prokýratýrasy Almaty oblystyq polıtsııa departamenti bastyǵynyń orynbasary Rýstam Abdrahmanov tergeýge alynýy týraly aqparatqa túsinikteme berdi, dep habarlaıdy QazAqparat tilshisi.
«Qazirgi ýaqytta Rústem Ábidirahmanov ornynda, qyzmetinen shettetilgen joq. Ol reıderlik iske qatysty kýáger sanalady jáne kýágerlerdiń qatarynda. Kúdikke ilikken joq. Odan jaýap alyndy, tergeý is-sharalary júrgizildi», - dedi QR Bas prokýratýrasy Qylmystyq qýdalaý qyzmetiniń bastyǵy Eldos Saǵıev vedomstvonyń bıylǵy jumysyn qorytyndylaýǵa arnalǵan baspasóz máslıhatynda BAQ ókilderiniń saýalyna oraı.
Sonymen qatar Bas prokýratýra ókili oǵan qatysty tintý is-sharalarynyń júrgizilmegendigin, uıaly telefony tárkilenbegendigin atap ótti.
Eske salsaq, buǵan deıin Almaty oblysynyń polıtsııa departament bastyǵynyń orynbasary Rýstam Abdrahmanovtan jaýap alynǵany týraly habarlandy.
