Almaty oblystyq bilim basqarmasy balabaqshadaǵy daýly qoıylym jóninde túsinik berdi
TALDYQORǴAN. QazAqparat - Almaty oblysynyń Talǵar aýdanyndaǵy Taldybulaq aýylynda «Bal butaq» jekemenshik balabaqshasyndaǵy tárbıeshilerdiń basy daýǵa qaldy, dep habarlaıdy QazAqparat tilshisi.
Áleýmettik jelide Jeltoqsan oqıǵasyna qatysty balabaqshada uıymdastyrylǵan erteńgiliktiń vıdeosy jarııalandy. Onda bir top bala qolynda oıynshyq qarýy mılıtsııa rólinde bolsa, ekinshi bir top bala olarǵa qarsy transparant ustap turǵan.
Osy jaıtqa baılanysty Almaty oblystyq bilim basqarmasynyń basshysy Dáýren Júnisov jaýap berdi.
«Mektepke deıingi tárbıe men oqytýdyń úlgilik oqý baǵdarlamasynda beınede kórsetilen baǵyttaǵy is-sharalar qarastyrylmaǵan jáne de ondaı sharalardy júrgizýge jol berilmeıdi. Bul - jekemenshik balabaqshanyń ózindik áýesqoılyq qoıylymy. Qazirgi tańda balabaqsha quryltaıshysy men ádiskeri Talǵar aýdandyq bilim bólimine túsindirý jumystaryn júrgizý úshin shaqyryldy. Sondaı-aq, óz tarapymnan, osyndaı is-áreketke jol berilmeýi kerektigi týraly jáne osyndaı is-áreketterge jol bergen osy adamdarǵa eń qatań jazalaý sharalary qoldanylatyn málimdeımin», - dep jazdy Dáýren Júnisov Facebook-tegi paraqshasynda.
Sondaı-aq, Almaty oblysy ákiminiń baspasóz hatshysy Ǵalymurat Júkel osy jaıtqa baılanysty Talǵar aýdandyq bilim bóliminiń basshylyǵyna da shara qoldanylatynyn QazAqparat tilshisine jetkizdi.
