Almaty, Nur-Sultan jáne Atyraý turǵyndary altyn quımalaryn kóp satyp alady

NUR-SULTAN. QazAqparat – Sáýir aıynda ekinshi deńgeıli bankter men jekelegen banktik emes aıyrbastaý pýnkterinde jalpy salmaǵy 61,3 kg altyn quımasy satyldy. Bul naýryzdaǵy kórsetkishpen salystyrǵanda 55,3% az, dep habarlaıdy QazAqparat Ulttyq bankke silteme jasap.

«Naýryzda satylymnyń ulǵaıýyna qarjy naryǵyndaǵy belgisizdik pen qubylmalylyq sebep boldy. Halyq qoldaǵy jınaǵyn saqtap qalý úshin balamaly qural retinde altynǵa ınvestıtsııalaýǵa múddeli boldy. Sáýirde valıýta naryǵyndaǵy jaǵdaıdyń turaqtanýyna baılanysty quıma satylymynyń tómendegeni baıqaldy. Degenmen ólshemdi quımalardy satý kólemi 2021 jylǵy ortasha aılyq satý kóleminen 37,3%-ǵa joǵary (2 694 dana) boldy. Ulttyq bank 2017 jyly halyqqa tazartylǵan altyn quımalardy satý jáne satyp alý baǵdarlamasyn iske qosty. Baǵdarlama qolǵa alynǵaly jalpy salmaǵy 3,1 tonnaǵa jýyq 91 229 altyn quıma satyldy», - delingen habarlamada.

Aıta ketsek, altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma.

Jalpy satylǵan quımalar arasynda onyń úlesi – 26%, ıaǵnı, 23 799 dana. Odan keıin 20 gramdyq quıma suranysqa ıe, 19 376 dana (21%), 5 gramdyq quımadan 18 599 dana (21%), 100 gramdyq quımadan 18 197 dana (20%), 50 gramdyq quımadan 11 258 dana (12%) satyldy. Altyn quımalar Almaty, Nur-Sultan jáne Atyraý qalalarynda kóp satylady.

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.