Almaty mýzeıinde Muqaǵalı Maqataevtyń 90 jyldyǵyna arnalǵan kóshpeli kórme ashyldy

ALMATY. QazAqparat - QR Táýelsizdiginiń 30 jyldyǵy men aqıyq aqyn Muqaǵalı Maqataevtyń 90 jyldyǵy aıasynda Almaty mýzeıinde «Alash jyrynyń aqıyǵy – muzbalaq Muqaǵalı» taqyrybynda jyljymaly kórme ashyldy, dep habarlaıdy QazAqparat tilshisi.

Kórmege aqynnyń shahmat taqtasy, dombyrasy, portfeli, qol saǵaty, sııa saýyty, qoljazbalary men jeke zattary qoıylǵan.

«Kelýshilerdiń nazaryna 50-ge jýyq eksponat usynylǵan. Ózderińiz biletindeı, bizdiń mýzeı Almaty qalasynan 300 shaqyrm qashyqtyqta ornalasqan. Ol jerge bári birdeı bara almaıdy. Sondyqtan kóshpeli kórme aqyn shyǵarmashylyǵyn súıetin jankúıerler úshin jaqsy múmkindik bolady. Osy jyldar ishinde bizdiń eksponattardyń qundylyǵy artyp keledi. Bir aıdyń ishinde barlyq almatylyqtar men qala qonaqtary Almaty murajaıyndaǵy osy kórmeni tamashalaı alady», - dedi M.Maqataevtyń ádebı-memorıaldyq murajaıynyń jetekshisi Erlik Ahmetov.

M.Maqataevtyń ádebı-memorıaldyq murajaıy Almaty oblysy, Raıymbek aýdany, Qarasaz aýylynda ornalasqan. Murajaı 1991 jyly ashyldy. Onda 734 jádiger bar, eksponattardyń 434-i - aqynnyń tutynǵan turmystyq zattary men kitaptary. Negizgi qory 548, qosymsha qory – 186.

Sharaǵa Almaty qalasy ákimdiginiń ókilderi, mýzeı qyzmetkerleri men aqynyń urpaqtary qatysty.

«Qazir ákemniń 90 jyldyǵyna arnalǵan kóptegen is-sharalar ótip jatyr. Jaqynda bizdiń qor onyń shyǵarmalarynyń on tomdyq jınaǵyn shyǵarýdy josparlap otyr. Men ákem týraly estelikterdiń qalǵanyna óte qýanyshtymyn. Halyq ony jaqsy kóredi jáne qurmetteıdi. Jas urpaq onyń óleńderin qýana oqıdy. Barlyǵyńyzǵa kóp rahmet», - dedi aqynnyń uly Juldyz Maqataev.