Almaty muǵalimderi qorshaǵan ortany qorǵaý máselesine arnalǵan bilim berý aktsııasyna qyzyǵýshylyqtaryn bildirýde - Eýropalyq Odaqtyń jobasy
ALMATY. Qazannyń 25-i. QazAqparat /Názıra Eleýhan/ - Almatyda Eýropalyq Odaqtyń jobasy aıasynda "Almaty qalasyndaǵy mektepter men qoǵamdastyqtardyń qorshaǵan ortany qorǵaý máseleleri boıynsha qoǵamdyq habardarlyǵyn damytý" atty jobaǵa arnalǵan "dóńgelek ústel" otyrysy bolyp ótti.
Joba QR Qyzyl Jarty Aı qoǵamynyń jáne Nıderlandy Qyzyl Krest yqpaldastyǵymen Eýropalyq Odaqtyń "Dostastyq táýelsiz elderge tehnıkalyq kómek" baǵdarlamasynyń qarjylandyrýymen iske asýda. Eropalyq Odaq jobaǵa 150 000 eýro bólgen. Jobanyń jalpy bıýdjeti - 172 000 eýro.
"Bıylǵy jyly qańtar aıynda bastalǵan jobanyń maqsaty - qorshaǵan ortany qorǵaý máselelerine oqý mekemeleri men jalpy barlyq qaýymnyń nazaryn aýdarý, ekologııalyq jaǵdaıdyń jaqsarýyna úles qosýǵa shaqyrý bolyp tabylady. Úles qosýǵa muǵalimderdiń de, oqýshylardyń da tarapynan qyzyǵýshylyq kóp. Osy ýaqyt aralyǵynda 250 usynystar jasalyp, taratyldy jáne qalanyń 15 mektebine qorshaǵan ortany qorǵaý boıynsha 300 anyqtamalyqtar jasaldy. Jobaǵa qatysýshy Alataý, Jetisý, Túrksib aýdandarynda ornalasqan osy 15 mektepte "jasyl aımaq" oryndary jasalyp, oǵan 800-den asa ár túrli aǵashtar egildi. Olardy kútý boıynsha keńester de berildi. Jumysymyz sapaly shyǵý úshin qalanyń tek úsh aýdanyn qamtydyq", dedi jobanyń úılestirýshisi Maksım Qadyrbaev. Onyń aıtýynsha, jobany iske asyrý barysynda sonymen qatar qorshaǵan ortany qorǵaý máseleleri boıynsha oqýshylar men muǵalimderge arnalǵan oqý materıaldary jasalǵan jáne atalmysh máselege nazar aýdarýǵa arnalǵan "dóńgelek ústel" otyrystary, aqparattandyrý jumystary, oqýshylarǵa arnalǵan trenıngter uıymdastyrylǵan, sonymen qatar "Almaty qalasynyń aýa basseıniniń lastanýy oqýshylardyń dene damýy men densaýlyǵyna áser etý ereksheligin anyqtaý"atty ǵylymı-zertteý júrgizilgen.
Joba jyldyń aıaǵyna deıin jalǵasady. Jalpy ýaqyty - 12 aı.
