«Almaty – Mılan» baǵytynda aptasyna eki ret avıareıs qatynaıdy

RIM. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdiniń Rım qalasynda Italııanyń Syrtqy ister jáne halyqaralyq yntymaqtastyq mınıstri Lýıdjı Dı Maıomen kezdesýinde aptasyna 2 ret qatynaıtyn «Almaty – Mılan» avıareısin oryndaý mańyzdylyǵy atap ótildi, dep habarlaıdy QazAqparat.

Taraptar Qazaqstan men Italııanyń joǵary basshylyǵy arasyndaǵy baılanystardyń qarqyndy damyp kele jatqanyn jáne ekijaqty ózara is-qımyldy nyǵaıtýǵa degen ózara qyzyǵýshylyqtyń artyp otyrǵanyn atap ótti.

Sonymen qatar syrtqy saıası vedomstvolardyń basshylary saıası, saýda-ekonomıkalyq jáne mádenı-gýmanıtarlyq yntymaqtastyqty odan ári damytý men tereńdetýdi jáne strategııalyq áriptestik rýhynda shart-quqyqtyq bazany nyǵaıtýdy talqylady. Úkimetaralyq jáne parlamentaralyq baılanystardy damytýǵa barynsha járdemdesý jóninde ýaǵdalastyqqa qol jetkizildi.
Qazaqstan SІM basshysy Italııamen ózara is-qımyl spektrin keńeıtý mańyzdylyǵyn atap ótti. «Italııa Qazaqstannyń Eýropadaǵy basty saýda seriktesteriniń biri. Biz sizdiń elińizben yntymaqtastyqqa úlken mán beremiz. dıplomatııalyq qatynastardyń 30 jyly ishinde biz jaqsy nátıjelerge qol jetkizdik», - dedi M.Tileýberdi.
Óz kezeginde Mınıstr L. Dı Maıo ıtalııalyq tarap ózara tıimdi yntymaqtastyqty keńeıtýge jáne joǵary deńgeıdegi saparlarmen almasýǵa múddeli ekenine sendirdi. «Qazaqstan Eýropalyq odaqpen Keńeıtilgen áriptestik pen yntymaqtastyq týraly kelisimge qol qoıǵan Ortalyq Azııadaǵy jalǵyz el. Biz Ortalyq Azııa óńirindegi senimdi seriktesimizben aldaǵy ýaqytta da ózara is-qımyl jasaýǵa daıynbyz», - dep atap ótti ıtalıandyq mınıstr.
Aıta ketetin jaıt, joǵary deńgeıdegi kezdesý Italııanyń Ulttyq kúni qarsańynda ótti. Osyǵan oraı, QR SІM basshysy Qazaqstan Prezıdenti Qasym-Jomart Toqaevtyń Italııa Prezıdenti Serdjo Mattarellaǵa joldaǵan quttyqtaýyn jetkizdi.
Ekijaqty yntymaqtastyqtyń mańyzdy elementi saýda-ınvestıtsııalyq ózara is-qımyl ekeni belgili. Osyǵan baılanysty Italııanyń isker toptar ókilderimen «dóńgelek ústel» ótkizildi. Іs-sharaǵa ıtalıandyq taraptan Italııa Syrtqy ister jáne halyqaralyq yntymaqtastyq mınıstriniń orynbasary, Qazaqstan-Italııa Ónerkásip jáne ekonomıkalyq yntymaqtastyq jáne almasý jónindegi úkimetaralyq jumys tobynyń teń tóraǵasy Manlıo Dı Stefano qatysty. Іs-shara barysynda eki el arasyndaǵy saýda jáne ınvestıtsııalyq baılanystardy keńeıtý boıynsha birlesken jumys joldary talqylandy.
Italııalyq bıznesmender Qazaqstanda óńdeý ónerkásibi, qurylys, kólik jáne logıstıka, aýyl sharýashylyǵy, mashına jasaý jáne jasyl energetıka salalarynda ózara tıimdi jobalardy iske asyrýǵa qyzyǵýshylyq tanytty.
«Almaty – Mılan» baǵyty boıynsha aptasyna 2 ret jıilikpen tikeleı áýe qatynasyn ashýdyń mańyzdylyǵy atap ótildi, bul eki eldiń saýda-ekonomıkalyq baılanysyn damytýǵa yqpal etetin bolady.
Italııa Qazaqstan ekonomıkasynyń iri ınvestorlarynyń biri. QR Ulttyq bankiniń derekteri boıynsha 2021 jyly Italııadan tikeleı sheteldik ınvestıtsııa kólemi 122,8 mln AQSh dollaryn qurady. Elder arasyndaǵy ózara taýar aınalymynyń kólemi 2021 jyly 9,6 mlrd dollar (eksport - 8,8 mlrd jáne ımport - 0,8 mlrd) qurady.

Eske salaıyq, bıylǵy 12 maýsymnan bastap «Mılan – Almaty – Mılan» baǵytynda tikeleı avıareıs ashylatynyn buǵan deıin jazǵan bolatynbyz.