Almaty metrosynyń vagondarynda múgedekter men júkti áıelderge arnalǵan oryndar paıda boldy
ALMATY. QazAqparat - 2016 jyldyń 6 sáýirinen bastap, Almaty metropolıteniniń vagondarynda múgedekter, zeınetkerler, júkti áıelder jáne balalary bar jolaýshylarǵa arnalǵan arnaıy oryndar belgilendi. Bul týraly búgin «Metropolıten» memlekettik kásipornynyń baspasóz qyzmetinen habarlady.
Arnaıy belgilengen oryndardy jolaýshylar aqparattyq bannerler arqyly bile alady. Olar vagon oryndyqtarynyń ústińgi jaǵyna japsyrylǵan. Halyqtyń jekelegen sanatyna jatatyn azamattar úshin Metropolıtenniń búkil jyljymaly quramynda barlyǵy 168 oryn qarastyryldy.
«Qazir bizde jolaýshylardyń kóbeıgeni baıqalyp jatyr. Búgingi tańda Almaty metrosy táýligine 41 myńnan astam jolaýshy tasymaldaıdy. Osyǵan baılanysty, múgedekter, zeınetkerler, júkti áıelder jáne mektep jasyna deıingi balalary bar jolaýshylar úshin arnaıy oryndar belgileý týraly sheshim qabyldandy. Árıne, bul oryndarǵa basqa da jolaýshylardyń otyra berýlerine bolady. Biraq, vagondarǵa joǵaryda atalǵan sanattaǵy azamattar mingen jaǵdaıda basqa jolaýshylardan olarǵa oryn berýin suraımyz», - dedi «Metropolıten» kommýnaldyq memlekettik kásipornynyń dırektory Aıdyn Orazhanov.
