Almaty metrosynyń bir jylda tapqan tabysy jarııa etildi
ALMATY. QazAqparat «Almaty metropolıteni» KMK 2016 jyly 873 mln teńge kóleminde tabys tapty. Bul týraly «QazAqparat» tilshisine kásiporynnyń baspasóz hatshysy Ajar Habıeva aıtty.
Onyń aıtýynsha, byltyr metro qyzmetin 12,4 mln adam paıdalanǵan. Onyń 348-i múmkindigi shekteýli jandar. Metroda jolaýshylar sany oqý jyly bastalatyn, qyrkúıek, qazan aılarynda ósedi.
«Kún saıyn metro qyzmetin 40 myńnan 50 myńǵa deıin adam paıdalanady. Demalys kúnderi bul kórsetkish 17-18 myńǵa deıin túsedi. 2015 jyly biz 10,6 mln adam tasymaldadyq», - dedi Habıeva.
Aıta keteıik, metromen júrýshiler qatary jańa «Saıran», «Máskeý» stansalarynyń ashylǵannan keıin artty.
Eske sala keteıik, Almaty metropolıteni 2011 jyly ashyldy. Alǵash 7 stansa paıdalanýǵa berilip, 2015 jyly eki stansa qosyldy.
Metronyń bes jyldyǵyn atap ótkende mekeme dırektory Nurlan Muhanov ashylǵan kúnnen bastap, 3 mlrd teńgege jýyq tabys tapqanyn aıtqan.
5 jyl jyl ishinde metro qyzmetin 42 mln adam paıdalanǵan.
