Almaty metrosynyń alǵashqy mıllıonynshy jolaýshysy - qala turǵyny Ádiljan Psıaev
ALMATY. 18 qańtar. QazAqparat /Erlik Erjanuly/ - Almaty metrosynyń alǵashqy mıllıonynshy jolaýshysy qala turǵyny Ádiljan Psıaev boldy.
«Almatymastertsentr» kompanııasynda sáýletshi bolyp jumys jasaıtyn ol «Jibek joly» metro beketinde óziniń jol júrý kartasyn tolyqtyrmaq bolǵan kórinedi.
«Meniń jumys ornym M. Áýezov atyndaǵy drama teatry metro beketiniń janynda bolǵandyqtan, men metro kóliginiń qyzmetin kúnine kem degende 2 ret paıdalanamyn. Jalpy, Qazaqstandaǵy tuńǵysh metro beketine kelgen kezde árdaıym meniń keýdemdi maqtanysh sezimi kerneıdi»,-deıdi. Á. Psıaev.
Oǵan mıllıonynshy jolaýshy bolǵany úshin «Almatymetropolıten» memlekettik kommýnaldyq kásipornynyń dırektory Murat Ókshebaev 3 aılyq merzimge metropolıten qyzmetin tegin paıdalanýǵa múmkindik beretin master karta tartý etti.
«Bizdiń birinshi qurmetti jolaýshymyz 2 jeltoqsan kúni metronyń ashylý rásimi kezinde Qazaqstan Respýblıkasynyń Prezıdenti Nursultan Nazarbaev bolǵan edi. Biz ózimizdiń alǵashqy mıllıonynshy jolaýshymyzdy atap ótý qajet dep sheshtik. Búgin ózderińiz kórgendeı, bul mártebege almatylyq Á. Psıaev ıe boldy. Jalpy, «Almatymetropolıten» qyzmetin paıdalanýshylar jeltoqsan aıynda táýligine 35-40 myń adamdy quraǵan edi. Qańtar aıynyń bas kezinde bul san 25 myń adamdy qurady. Al qazirgi tańda 16-17 myń bolyp otyr. Munyń sebebi, elimizdegi tuńǵysh metro qyzmetin bastapqy kezde qala turǵyndary men qonaqtary kórip tamashalaý úshin paıdalansa, qazir olar endi naqty óz qajeti úshin qoldana bastady»,-dedi M. Ókshebaev.
