Almaty metrosynda jolaýshylar mozaıkadan jasalǵan sýretterdi tamashalady (FOTO)
ALMATY. QazAqparat - Almaty metrosynda monýmentaldy janrdyń «Nurly jol óner joly» kórmesi ashyldy. Mádenı sharany Almaty kúni aılyǵyna oraı Almaty ákimdigi, T.Júrgenov atyndaǵy óner akademııasy, «Metropolıten» MKK, QR Sýretshiler odaǵynyń óner murajaıy uıymdastyrdy.
Ekspozıtsııa kórkem vıtraj ben mozaıkadaǵy negizgi úrdisterdi kórsetti.
Monýmentaldy janrǵa eskertkishter, monýmentter, músin óneri, beıneleý óneri, ǵımarattardy mozaıkamen árleý, vıtraj óneri jatady.
Kelýshiler qazaqtyń zııaly qaýym ókilderi Ahmet Baıtursynov, Sáken Seıfýllın, Baýyrjan Momyshuly, Shámshi Qaldaıaqovtyń mozaıkadan jasalǵan beınelerin tamashalady. Sondaı-aq, áınek synyqtarynan óner týyndylary qalaı qurastyrylatynyn tamashalady.
«Osynaý mádenı merekege jınalǵan qadirli qaýym, jolaýshylar, avtorlar, sizderdi qala kúnimen quttyqtaǵym keledi. Osyndaı kórmeni uıymdastyryp jatqan azamattarǵa alǵysym sheksiz. Bul halyqty mádenıetke, ónerge bir taban jaqyn etedi. Kúndelikti kúıbeń tirlikte eshkimniń arnaıy kórme tamashalaýǵa ýaqyty joq. Bul qala turǵyndaryna, jolaýshylaryna úlken mádenı oqıǵa bolary sózsiz. Metroda kontsert, kórme ótkizý óte tamasha bastama», - dedi T.Júrgenov atyndaǵy Qazaq Ulttyq Óner Akademııasynyń prorektory Baıjan Ýalhanov.
Aıta ketý kerek, Jibek joly stansasynyń tula boıynda ornalasqan kórme óner akademııasy stýdentteriniń qolymen jasaldy.
Sondaı-aq, Óner akademııasynyń jas dızaınerleri kelýshilerge óz kollektsııalaryn kórsetti.
Kórme 30 qyrkúıekke deıin jalǵasady.
