Almaty metrosynda bılet teksermeıtin týrnıket ashyldy
ALMATY. QazAqparat - Búgin Almaty metrosynda «Almaty - adaldyq alany» jobasy aıasynda «Abaı» metro beketinde adaldyq týrnıketi ashyldy, dep habarlaıdy QazAqparat tilshisi.
Sharaǵa QR Memlekettik qyzmet jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov, memlekettik organdar, jastar uıymdary, qoǵamdyq birlestikter ókilderi qatysty.
Mundaı týrnıket bir aı buryn «Almaly» beketinde pılottyq joba retinde oıdaǵydaı júzege asqan bolatyn. Aıtalyq, ashylǵan sátten bastap «adaldyq týrnıketi» arqyly 12 myńnan astam adam ótken. Onyń ishinde 48 adam ǵana jolaqyny tólemegen.
«Jol aqysyn tólemegen azamattardy sýretke túsirip, metro vagondaryndaǵy ekrandardan kórsetý jáne osy ádis arqyly olardyń boıynda adamgershilik pen adaldyq qasıetterin qalyptastyrý usynylǵan edi. Biraq birinshi kezekte monıtorıngpen shekteldik», - dedi «Almaty - adaldyq alany» jobasynyń ofıs jetekshisi Aleksandr Bratenkov.
«Almaty - adaldyq alany» jobalyq keńsesi men metropolıten birlesip qolǵa alǵan kedergisiz ótý júıesi «Abaı» beketinde ornatylyp, bastama jalǵasyn taýyp otyr. Munda kún saıyn 4-5 myńǵa jýyq adam metro qyzmetin paıdalanady. Onyń basym kópshiligi - stýdentter, óıtkeni kóptegen JOO osy stansa mańynda ornalasqan», - dedi Oljas Bektenov.
Osyǵan uqsas jobalar Almaty qalasynda buryn qolǵa alynǵan. Qaladaǵy JOO-nyń kópshiliginde «adaldyq dúkenderi» bar. Oǵan kelýshiler tólemdi ózderi jasaıdy, dúkende satýshy joq.
Qazirgi kezde iri sýpermarketter jelisinde satýshysy joq kassalardy ashý boıynsha jumystar júrip jatyr.
