Almaty metrosynda álemdik áleýmettik jarnama kórmesi ashyldy (FOTO)
ALMATY. QazAqparat- Almaty metrosynyń «Baıqońyr» beketinde álemdik áleýmettik jarnama kórmesi ashyldy.
«Baýyrjan» qaıyrymdylyq qory bul sharany qazir qalada ótip jatqan «Make It Clear!» áleýmettik jarnama baıqaýy aıasynda uıymdastyrdy.
Onda negizinen jol qaýipsizdigi erejesi, ekologııa, maskúnemdik, temeki qumarlyq sekildi áleýmettik máseleler kóterilgen.
Uıymdastyrýshylardyń aıtýynsha, áleýmettik jarnamanyń basty qaǵıdasy - adam ómirin jaqsartý.
«Biz osyndaı áleýmettik jarnamalar, keıde tipti jan túrshiktirer kórinister arqyly adamdardyń nazaryn qoǵamdyq máselelerge aýdarǵymyz keledi. Áleýmettik máselelerdi osyndaı áleýmettik jarnamalar arqyly kópshilikke jetkizý ońaı ári tıimdi. Osylaısha adamdar óz kózimen kórgen soń, qoǵamdyq sıpattaǵy máselelerge, solardyń ishinde jol qaýipsizdigine, ekologııaǵa jáne basqa da máselelerge jiti kóńil aýdara bastaıdy. Osydan baryp adamdardyń júris-turysy, minez-qulqy jaqsy jaǵyna ózgerýi múmkin, - dedi kórmeni uıymdastyrýshylar.
Barlyǵy kórmege shet eldik avtorlardyń 60 plakaty kórermen nazaryna usynyldy.
Metro jolaýshylary bul jumystardy aldaǵy 30 qazanǵa deıin tamashalaı alady.
Aıta ketelik, buǵan deıin Almatyda mundaı kórme 2013 jyly uıymdastyrylǵan bolatyn.
