Almaty metrosy jolaýshynyń ótinishin eskerip, jumys ýaqytyn ózgertti
ALMATY. QazAqparat - Almaty metrosy budyn bylaı 10 mınýtqa erte ashylatyn bolady. Bul týraly QazAqparat tilshisine «Metropolıten» MKK Aıgúl Eshmaǵanbetova aıtty.
«Mamyrdan bastap jerasty kóliginiń jumys kestesi ózgerdi. Birinshi poıyz 6.20-da keletin boldy. Buǵan deıin metro tańǵy saǵat 6.30-da ashylatyn bolǵan. Bul ózgeristiń poıyzdardyń júrý kestesine qatysy bolmaıdy», - dedi ol.
Onyń aıtýynsha, buǵan bir jolaýshynyń metropolıten saıtyna jazǵan ótinishi sebepker bolǵan.
«Jolaýshy 6.30-da metroǵa kirgen soń, bılet alyp, júrdek baspaldaqpen túskenshe biraz ýaqytyn joǵaltyp, 6.34-te attanatyn poıyzdan únemi keshigip qalatynyn jetkizgen edi. Ol kisiniń ótinishine oraı biz metronyń ashylý ýaqytyn ózgerttik. Endi jolaýshylar metroǵa asyqpaı kelip, poıyzdaryna asyqpaı jaıǵasa alady», - dedi A.Eshmaǵanbetova.
