Almaty metropolıteni bes jyldyǵyn atap ótti
ALMATY. QazAqparat - Almaty metropolıteni iske qosylǵanyna bes jyl tolýyn atap ótti. Aıtýly merekelik keshke qala ákimi Baýyrjan Baıbek kelip, kópshiliktiń qýanyshymen bólisti, dep habarlaıdy QazAqparat.
Almaty ákimi óziniń quttyqtaý sózinde metronyń paıda bolýy kez kelgen qalanyń qýatty damýymen baılanysty ekendigin jáne qazirgi zamanǵy megapolısti metropolıtensiz elestetý múmkin emes ekendigin aıtty.
«Almaty metrosynyń tarıhy bar. Onyń qurylysy 80-shi jyldardyń sońynda bastalǵan edi, biraq Memleket basshysynyń aıryqsha qoldaýynyń arqasynda metropolıten qurylysy Táýelsiz Qazaqstan tusynda jandana tústi. Bul joba, tipti, daǵdarys kezeńderinde de jalǵasyn tapty», - dedi Baıbek.
Paıdalanýǵa berilgen sátten bastap Almaty metrosy 40 mıllıondaı qala turǵyny men qala qonaǵyn tasymaldaǵan. Jyl saıyn jolaýshylar legi 20 paıyzǵa artýda.
Metro aldaǵy ýaqytta batys baǵytynda - Abaı dańǵylynan ıAssaýı kóshesine deıin damıdy. 2020 jylǵa deıin «Saryarqa» jáne «Dostyq» dep atalatyn eki beket ashylady. Bul qalanyń halyq tyǵyz ornalasqan aýdandaryn qamtýǵa múmkindik beredi. Kúndelikti jolaýshylar leginiń sany - 85 myń adam bolady dep boljanýda. Sonymen birge, eki bekettiń - «Qalqaman» jáne «Batys» avtovokzalynyń qurylysy josparlanǵan. Bular iske qosylǵanda kúndelikti jolaýshylar aǵyny 120 myń adamnan asady dep kútilýde.
