Almaty men Tbılısı basshylary yntymaqtastyqty nyǵaıtpaq
Almaty ákimi Baýyrjan Baıbek Grýzııaǵa jumys sapary aıasynda Tbılısı meri Kahaber Kaladzemen kezdesti. Taraptar qala keńistigin, saýda- ekonomıkalyq baılanysty damytý, tájirıbe almasý jáne týrızm salasynda yntymaqtastyqty nyǵaıtý máselelerin talqylady.
Tbılısı merimen áńgime barysynda Baýyrjan Baıbek Almatyda birqatar iri ınfraqurylymdyq jobalardyń iske asqanyn, logıstıka, týrızm, «Smart city» jobasy salalarynda grýzındik bıznesmender úshin úlken ınvestıtsııalyq áleýettiń qalyptasqanyn atap ótti.
«Biz Tbılısıde qoǵamdyq keńistikti qurý qaǵıdalarymen tanystyq. Byltyr qalanyń tarıhı ortalyǵynyń úshten biri jańardy, bıylǵy jyly da dál osyndaı keńistikti qaıta jańǵyrtýdy josparlap otyrmyz. Almaty ekonomıkasynyń jańa draıveri dep tanylǵan týrıstik salada zańnamalyq sheshimder men marketıng josparlar jasaýdaǵy Grýzııanyń tájirıbesi bizdi qyzyqtyrady. Almaty men Tbılısı arasyndaǵy yntymaqtastyq jónindegi kelisimge qol qoıylǵanyna bıyl 25 jyl tolady, sondyqtan men 2018 jyldyń ekijaqty baılanysty odan ári nyǵaıtýdyń jańa kezeńi bolatyndyǵyna senimdimin», - dedi Almaty ákimi.
Sóz kezegin alǵan Tbılısı meri eki el arasynda únemi jyly ári baýyrlastyq qarym- qatynastyń ornyqqanyn, endi eki qala arasyndaǵy yntymaqtastyqty nyǵaıtýdyń mańyzdy ekenin atap ótti. Kezdesý barysynda Kaha Kaladze Almatydaǵy kólikti turaqtandyrý jáne turmystyq qatqyl qaldyqtardy kádege jaratý jónindegi jobalarǵa qyzyǵýshylyq bildirdi.
«Damý qarqyny joǵary bolǵan saıyn megapolısterde ortaq problemalar qalyptasady, olar - jeke kólik sanynyń artýy, ınjenerlik jelilerdiń tozýy, turmystyq qatqyl qaldyqtardy kádege jaratý. Bulardyń barlyǵy ekologııany nasharlatady, sondyqtan bizde de Almaty sııaqty qoǵamdyq kólikti turaqtandyrý júıesi mańyzdy aspekt bolyp tabylady. Qazirgi kezde Tbılısı avtoparkinde 700 avtobýs bar, biraq biz ony odan ári jańartamyz. Budan ózge, jaqyn aradaǵy birneshe jylda eski qalany qaıta jasaýdy josparlaýdamyz. Men aıtylǵan barlyq baǵyttar boıynsha yntymaqtastyqty nyǵaıtý men tájirıbe almasýdy kúsheıtý úlken áleýettiń bar ekenine senimdimin», - dedi Tbılısı meri.
Grýzııaǵa jumys sapary barysynda Baýyrjan Baıbek Grýzııa premer-mınıstriniń birinshi orynbasary, ekonomıka jáne turaqty damý mınıstri Dmıtrıı Kýmsıshvılmen júzdesti.
Taraptar týrızm salasy men bıznes- klımatty jaqsartý jónindegi ózara yntymaqtastyq máselelerin talqylady. Búgingi tańda Grýzııa Búkilálemdik «Doing Business» bankiniń reıtınginde toǵyzynshy pozıtsııada jáne týrıstik baǵytty damytýda edáýir alǵa jyljýda. Tek 2017 jyldyń ózinde ǵana Grýzııada 7,5 mln astam týrıst barǵan.
«Búgingi kúni Qazaqstan Grýzııada bolǵan elderdiń TOP-10 qataryna engen. Bizdiń kóptegen otandastarymyz Qazaqstanda bolyp qaıtty. Biz yntymaqtastyqty jáne ekonomıkanyń týrıstik klasterin damytý tájirıbesin almasýdy nyǵaıtýǵa nıettimiz», - dedi Dmıtrıı Kýmsıshvılı.
Dál osy kúni Almaty delegatsııasy «bir tereze» qaǵıdasy boıynsha azamattarǵa memlekettik qyzmettiń úlken spektri kórsetiletin Ádilet úıiniń jumysymen tanysty. Bul mekemeniń basty ereksheligi birqatar memlekettik qyzmetti «Drive-thgu» júıesi boıynsha avtomobılden shyqpaı alýǵa bolady eken.
Aıta keterligi, 2017 jyly Almaty men Grýzııa arasyndaǵy taýar aınalymy 2016 jylmen salystyrǵanda 14,5%-ǵa artqan. Qalada saýda, qarjy, qurylys, medıtsına jáne basqa salalarda grýzındik kapıtalmen 51 kásiporyn jumys isteýde.
