Almaty men Taldyqorǵanda janarmaı beketin tonaǵan taksıst ustaldy

TALDYQORǴAN. QazAqparat – Almaty jáne Taldyqorǵan qalasynda janar-jaǵarmaı beketin tonaýshy ustaldy, dep habarlaıdy QazAqparat tilshisi Almaty oblystyq polıtsııa departamentiniń baspasóz qyzmetine silteme jasap.

Polıtsııa Almaty oblysynyń eki qalasyndaǵy janarmaı beketterine qarýly shabýyl jasaǵan taldyqorǵandyq 27 jastaǵy taksı júrgizýshisin ustady.

«Respýblıkalyq tasjoldyń birinde jedel ýákilder jeńsiz keýdeshe, kózge arnalǵan oıyqtary bar toqylǵan bas kıim men urlanǵan qol sómkeni tapty. Kúdikti 27 jastaǵy taldyqorǵandyq bolyp shyqty. Ol jalǵa «Toyota Camry» avtokóligin alyp, taksı qyzmetimen aınalysqan», - dedi Almaty oblysy polıtsııa departamenti basshysynyń orynbasary Eldar Ábdikenov.

Sondaı-aq, resmı habarlamada aıyptynyń avtokóligin tintý kezinde alty patrony bar RS-31 revolveri tabylǵany aıtylǵan.

«Ol qarýdy eki qylmys jasaý kezinde de qoldanǵan. Qarý tárkilenip, ballıstıkalyq saraptamaǵa jiberildi», - deıdi vedomstvodan.