Almaty men taǵy eki oblystan 145 qarý tárkilendi

ALMATY. QazAqparat- Jedel izdestirý sharalarynyń nátıjesinde Almaty qalasy men Almaty, Jambyl oblystarynda 145 qarý-jaraq tárkilendi. Bul týraly qalalyq polıtsııa departamenti basshysynyń orynbasary Rýstam Ábdirahmanov málim etti, dep habarlaıdy QazAqparat tilshisi.

«Jedel izdestirý sharalarynyń nátıjesinde Almaty qalasy men Almaty, Jambyl oblystarynda 145 qarý-jaraq tárkilendi, onyń 82-si Almaty qalasynda ornalasqan qarý-jaraq dúkenderinen urlanǵany belgili boldy»,- dedi polıtsııa ókili.

Sonymen qatar, ol qarý qabyldaý aktsııasy jalǵasyp jatqanyn tilge tıek etti.

«Azamattarǵa zańsyz saqtalǵan nemese tabylǵan qarýdy óz erkimen tapsyrý múmkindigi beriledi. Sonymen qatar, QR QPK-niń 287 babyna sáıkes - qarý men oq-dárilerdi tapsyrǵan adamdar qylmystyq jaýapkershilikten bosatylady»,-dedi ol.

Rýstam Ábdirahmanov medıtsınalyq mekemede jatqan 16 kúdiktiniń tergeýge alynǵanyn aıtty.

«16 adam Qazaqstan Respýblıkasy Qylmystyq kodeksiniń 272-babynda kózdelgen qylmys, ıaǵnı jappaı tártipsizdikke qatysqany úshin sotqa deıingi tergep-tekserýdiń biryńǵaı tizilimine tirkelgen qylmystyq is boıynsha kúdikti»,- dep túsindirdi ol. Joǵaryda atalǵan kúdiktilerge qatysty tergeý soty bultartpaý sharasyn sanktsııalady. «Qamaý ızolıatoryndaǵy jaralylarǵa barlyq qajetti medıtsınalyq kómek kórsetiledi»,- Rýstam Ábdirahmanov.