Almaty men Sharm-el-Sheıh qalalary arasynda áýe reısi ashylady
ALMATY. QazAqparat - Taıaý ýaqytta Almaty men Mysyrdyń Sharm-el-Sheıh qalasy arasynda tikeleı áýe baılanysy ashylady.
Qazir osy baǵytta eki el arasynda kelissózder júrip jatyr.
Bul týraly búgin Almatyda Mysyr men Qazaqstan arasynda týrıstik salada yntymaqtastyqtyń jańa kezeńine arnalǵan baspasóz máslıhaty barysynda Mysyrdyń Týrızm ákimshiliginiń bólim basshysy Ahmed Shýkrı málim etti.
«Taıaý ýaqytta Almaty men Sharm-el-Sheıh qalasy arasynda tuńǵysh ret tikeleı áýe baılanysy iske qosylady. Bul jerde týrısterge arnalǵan arnaıy baǵdarlama júzege asyrylady. Bılet baǵasy - 400-420 AQSh dollaryn quraıtyn bolady. Alǵashqy eki aı ishinde baǵa budan da azaıady. Alǵashqy kezeńde áýe reısterin Mysyrdyń memlekettik EgyptAir áýe kompanııasy júzege asyrady», - dedi óz sózinde A. Shýkrı.
Sonymen qatar, ol ótken jyly qarasha aıynda Mysyrdyń Sınaı túbeginde Reseıdiń jolaýshy ushaǵynyń qulaýyna baılanysty, Mysyrǵa keletin týrıster leginiń azaıǵandyǵyn jetkizdi. Onyń aıtýynsha, bıylǵy jyldyń basynan beri Mysyrdyń týrızm salasyndaǵy tabys 250 mln dollarǵa tómendegen.
Jańa áýe reısterin qosý týrıster legin kóbeıtý maqsatynda qolǵa alynyp otyr. Bul jerde mysyrlyq tarap eń aldymen qaýipsizdik máselesine jiti kóńil bólinip jatqandyǵyn, sondyqtan týrısterdi alańdamaýǵa shaqyrdy. Áýejaılar men demalys oryndarynda kúzet barynsha kúsheıtilip, ol jerlerge ornatylǵan beınebaqylaý kameralarynyń sany arttyrylǵan.
