Almaty men Sankt-Peterbor yntymaqtastyqtyń «Jol kartasyn» ázirleıdi
ALMATY. QazAqparat- Sankt-Peterbor úkimetiniń múshesi – ultaralyq qatynastar jáne kóshi-qon saıasatyn iske asyrý komıtetiniń tóraǵasy Oleg Kapıtanov bastaǵan reseılik delegatsııa mádenı-iskerlik mıssııamen Almatyǵa keldi, dep habarlaıdy QazAqparat tilshisi.
Sankt- Peterbordan kelgen delegatsııany Almaty ákimi Baqytjan Saǵyntaev qabyldady. Shahar basshysy Oleg Kapıtanovpen eki qala arasyndaǵy qarym-qatynasty damytý perspektıvalaryn talqylady. Taraptar densaýlyq saqtaý, bilim, týrızm, mádenıet jáne ShOB salalarynda yntymaqtastyqtyń «Jol kartasyn» ázirleýge kelisti.
Sonymen qatar, delegatsııa «Almaty-Sankt Peterbor: jańa múmkindikter aýmaǵy» konferentsııasyna qatysty.
Jıyn barysynda Almaty qalasy ákiminiń orynbasary Erjan Babaqumarov, «bul basqosýdyń Almaty men Sankt-Peterbor arasyndaǵy mádenı qarym-qatynasty damytýǵa oń yqpal etetindigin» atap ótti.
«Almaty men Sankt-Peterbor kórshilik qarym-qatynasty nyǵaıtýda úlken ról atqarady. Bizdiń eki qalamyz tarıhı turǵyda birine-biri uqsas jáne shyn máninde óz elderiniń mádenı jáne iskerlik ortalyqtary bolyp sanalady.
Aıtar bolsaq, Almaty men Sankt-Peterbor arasyndaǵy baýyrmaldyq qatynasqa 20 jyldan astam ýaqyt ótti. Biz búgin yntymaqtastyqty odan ári jalǵastyrýǵa jańa serpin beretin bolamyz», - dep atap ótti Erjan Babaqumarov.
Óz kezeginde, Almatydaǵy Reseı Federatsııasynyń Bas konsýly Evgenıı Bobrov Qazaqstan men Reseıdiń birlesken jumysty odan ári jandandyrýy qajettigin aıtty.
«Bizdiń eki memleketimiz tek strategııalyq odaqtastar ǵana emes, sonymen qatar teń turǵydaǵy seriktester. Rasynda da bizdiń ortaq ári óte baı tarıhymyz bar. Bizdiń basty mindetimiz - ata-babalarymyzdan qalǵan barlyq qundylyqtardy saqtap qana qoımaı, olardy baıytý jáne ózara baılanysymyzdy jaqsartý», - dedi Evgenıı Bobrov.
Onyń aıtýynsha, 2018 jyly Reseı men Almaty arasyndaǵy taýar aınalymy 4,7 mlrd dollardy quraǵan.
Konferentsııa barysynda Sankt-Peterbor úkimetiniń múshesi – ultaralyq qatynastar jáne kóshi-qon saıasatyn iske asyrý komıtetiniń tóraǵasy Oleg Kapıtanov Almaty men Sankt-Peterbordyń birdeı tuǵyrly alańda turǵanyn atap ótti.
«Bizdiń delegatsııanyń quramynda mádenı qaýymdastyqtyń, bilim men ǵylym salasynyń ókilderi, bıznesmender bar. Almatyǵa Sankt-Peterbordyń eń ozyq kompanııalary keldi. Basty maqsat - tek mádenı-tanymdyq ǵana emes, sonymen qatar bızneste, bilim men gýmanıtarlyq jobalarda uzaq merzimdi ári eki jaqqa da paıdaly shynaıy praktıkalyq baılanystardy ornatý», - dep atap ótti O. Kapıtanov.
Sankt-Peterbordyń delegattary Almaty ákiminiń kásibı basqarmalary basshylarymen saýda-ekonomıkalyq yntymaqtastyq áleýetin, ózara baılanys pen mektep jasyna deıingi, jalpy, qosymsha jáne kásibı bilim berý júıelerindegi birlesken jobalardy iske asyrýdy talqylady. Budan ózge, kún tártibine gýmanıtarlyq yntymaqtastyqtyń, sonyń ishinde mádenıet jáne týrızm salalaryndaǵy seriktestiktiń áleýetti máseleleri engizildi.
Shara aıasynda Sankt-Peterbor týraly ádebıetti QR Ulttyq kitaphanasyna saltanatty túrde tapsyrý rásimi jáne «Kvıntet Chetyreh» mýzykalyq ujymy men Marıınsk teatrynyń solısi Leonıd Zahojaevtyń merekelik kontserti ótti.
