Almaty men Rıga arasynda aldaǵy jyly tikeleı áýe reısi ashylady
ASTANA. QazAqparat - Latvııa eliniń airBaltic ulttyq kompanııasy kelesi jyly Rıga men Almaty arasynda tikeleı áýe reısin ashýdy kózdep otyr, dep habarlaıdy «QazAqparat» HAA tilshisi.
«Qazirden bastap airBaltic kelesi jyly Almatyǵa ushaq ushyra bastaıtynyn naqty aıtýǵa bolady. Ol reıs Almaty men Rıgany baılanystyrady. Bıylǵy jyly biz jańa Bombardier CS 300 ushaqtaryn alyp keldik. Latvııa arqyly 60 elge tikeleı reıpen ushýǵa bolady», - dedi Latvııa Kólik mınıstrligi memlekettik hatshysynyń orynbasary Ýldıs Reımans Astanada ótip jatqan H «TransEýrazııa-2017» kólik-tranzıttik áleýet jónindegi halyqaralyq konferentsııa barysynda.
Ol óz sózinde eýrazııalyq tasymaldy artyrý úshin halyqaralyq seriktestikti damytý jumysyna basa mańyz berilip otyrǵanyn atap ótti.
«Latvııa qashan da Lıtva, Estonııa, Reseı, Belarýs,Qazaqstan sekildi eldermen qarym-qatynas ornatýǵa ashyq. Biz qashanda ózara tıimdi seriktesti qoldaıtyn bolamyz», - deıdi Ýldıs Reımans.
