Almaty men Petropavl arasynda jańa júrdek quram paıdalanýǵa berilýde - «Jolaýshylar tasymaly» AQ

ASTANA. 23 sáýir. QazAqparat - «Jolaýshylar tasymaly» AQ jyljymaly quramnyń tehnıkalyq resýrsyn jańartý jáne nyǵaıtý baǵdarlamasyn júzege asyrý aıasynda №151/152 «Almaty-2-Petropavl» baǵytyna 31 «Tulpar-Talgo» vagonynan turatyn jańa júrdek quramdy paıdalanýǵa berýde.

Osyǵan oraı, 2013 jyldyń 1 mamyrynan bastap №151/152 «Almaty-2-Petropavl» baǵytyndaǵy «Jetisý» júrdek poıyzy kúndelikti qatynaýǵa aýysýda. Poıyzdyń Almatydan Petropavlǵa deıingi júrý ýaqyty 18 saǵat 45 mınýtty, keri baǵytta 18 saǵat 54 mınýtty quramaq.

Poıyzdyń jańa quramy 22 «Týrıst» sanatty (tórt oryndyq), 2 «Bıznes», 2 «Grant» vagondarynan quralǵan. Sondaı-aq, poıyzda 1 meıramhana vagon, 1 vagon-bar men 3 tehnıkalyq vagon qamtylǵan.

«Atalmysh baǵyttyń artyqshylyǵy - jolaýshylar Almatydan Býrabaı jáne Kókshetaý kýrorttyq aımaǵyna poıyz aýystyrmaı, bir qurammen dittegen jerine jete alady. Buǵan deıin olar Astanada basqa poıyzǵa aýysyp otyrýlary kerek edi»,-delingen taratylǵan habarlamada.

Astanadan Almatyǵa jáne keri baǵytta saparlap júrgen jolaýshylar úshin bul júrdek poıyzdyń qosymsha marshrýty, óıtkeni jazǵy maýsymda eki úlken qala arasyndaǵy qatynas úlken suranysqa ıe.

Atap óter jáıt, ústimizdegi jyldyń sáýirinen «Jolaýshylar tasymaly» AQ atalmysh poıyz vagondarynda jol júrýge 20 paıyz jeńildikter engizdi.