Almaty men Nur-Sultanda HQO-dan daıyn qujaty úıge jetkizý qyzmeti iske qosyldy
«Azamattarǵa arnalǵan úkimet» klıenttiń úıine deıin daıyn qujattardy jetkizý qyzmetin kórsetýde 144 Memlekettik qyzmetti qamtıdy. Onyń ishinde jyljymaıtyn múlikke quqyqtardy (aýyrtpalyqtardy) memlekettik tirkeý, jer ýchaskesiniń aktisi, bilim týraly qujatty apostıldeý, muraǵat anyqtamasy, áskerı bılettiń telnusqasyn berý jáne basqalar bar. Jaqyn arada júrgizýshi kýáligin, jeke kýálikti, pasportty jáne basqa da qujatty úıge deıin tapsyryspen jetkizý qyzmetri qoljetimdi bolady.
Qujattar daıyn bolǵannan keıin klıenttiń qajetti mekenjaıyna qujatty jetkizýdi rásimdeýdi usynatyn veb-siltemesi bar SMS-habarlama joldanady. Qyzmet aqyly, qala boıynsha jetkizý quny – 970 teńge.
«Biz qazaqstandyqtar úshin memlekettik qyzmetterdi alý kezinde barynsha qolaıly jaǵdaı jasaýǵa tyrysamyz. Qujattardy úıge jetkizý servısin ótken jyly synaı bastadyq jáne birtindep ony jetildirip kelemiz. Bul bizdiń klıentterimizdiń memlekettik qyzmetterdi alý barysyn jeńildetip, olardyń qarjysy men ýaqytyn aıtarlyqtaı únemdeıdi. Búginde servıs almatylyqtar men elorda turǵyndary úshin qoljetimdi, jaqyn arada servısti ózge qala turǵyndary da paıdalana alatyn bolady» – dedi «Azamattarǵa arnalǵan úkimettiń» basqarma tóraǵasy Ádil Qojyqov.
Qujattardy jetkizý boıynsha pılottyq joba bir aı buryn astanalyq HQO-lardyń birinde iske qosyldy, onda seriktes kýrerlik qyzmet arqyly 50-den astam qujat jetkizildi. 2020 jyldyń qazan aıynda egov.kz elektrondyq úkimet portalynda osyǵan uqsas qyzmet paıda boldy – ol kezde avtokólikterdiń memlekettik nómiri men daıyn tehpasportyn úıge jetkizý servısi iske qosyldy.
